مسلسل ( أنا تعبت من نفسى )

بسم الله الرحمن الرحيم

هناك موضوع شيق جدا قرأته

فى ملتقى آخر فأردت أن أطلعكم عليه

بس هناك مشكلة

الموضوع طويل جدا ( حلقات كتير )

أنا كنت حابب ان أعرض لكم حلقة كل يوم

فياريت أى عضو عنده رأى آخر يبلغنى

ويا ريت ما تملوش منها علشان هى بجد جميلة

والآن مع الحلقة الأولى


السلام عليكم ورحمة الله وبركاته

(1)
"أحمد !! أنا تعبت من نفسي والله !!!!"
انطلقت الجملة كالرعد على أسماع أحمد...حيث لم يكن يدري أن حال صديق عمره خالد قد ساء إلى هذا الحد...

ما الذي يعنيه خالد وما هي قصته ؟؟
هذا ما سنستعرضه معا بإذن الله..


فلنعد للوراء 10 دقائق فقط لنفهم ماذا حدث...

ترررررن ترررررن..جرس الهاتف يرن في حجرة خالد..
ترررررن ترررررن...


ظل الرنين طويلا..
وأخيرا رفع خالد سماعة الهاتف في بطء...
خالد: "سلام عليكم"
أحمد: وعليكم السلاااااام ورحمة الله وبركاته....يا هلا يا هلا"
خالد: أحمد ؟..إزيك يا أحمد..
أحمد: إيه ده إيه ده...مالك كده فيه إيه ؟
خالد: إيه ؟
أحمد: صوتك مش طبيعي !...أنت زعلان من حاجة ولا إيه ؟
خالد: لا أبدا..مفيش
أحمد: خالد فيه حاجة بجد ؟...أنت زعلان مني في حاجة ؟
خالد: لا والله يا أحمد صدقني..أنا بس كنت..يعني.....تعبان شوية..
أحمد: تعبان ؟ ..سلامتك يا عم...مالك عندك برد ولا إيه ؟
خالد:..ههه..لا يا عم أنا مش عيان ...أنا بس زي ما تقول كده مكتئب حبتين...
أحمد: لا إله إلا الله...حصل إيه بس
خالد: خلاص بقى يا أحمد الله يكرمك...خير إن شاء الله..ادعيلي بس
أحمد: طب فهمني بس يمكن أقدر أساعدك..
صمـــت..
أحمد: ها ؟
خالد:..والله مش عارف أقول لك إيه يا أحمد..أنت صاحبي وحبيبي كمان والله بس..بس أنا مش عارف مالي,,,
أحمد: طب ولما أنا صاحبك وحبيبك بتخبي عليا ليه بقى ؟
خالد:....أصل الموضوع طويل فعلا يا أحمد
أحمد: والله يا خالد أنا مش عايز أتقل عليك بس أنا مابأحبش أشوفك مكتئي كده..
صمت...
خالد: أحمد !! أنا تعبت من نفسي والله !!!!
صمت يتخلله صوت تنفس شديد..
أحمد:...آ..آآ..طب...طب اهدى بس..
خالد:..............
أحمد:..خالد بالله عليك اهدأ...اهدأ بس علشان نفكر مع بعض...بص...تقابلني الليلة في صلاة العشاء في مسجد الرحمة..ماشي ؟
خالد: طيب يا أحمد..إن شاء الله..
أحمد: إن شاء الله..ولو سمحت اهدأ شوية على ما أقابلك..وما تخافش كل حاجة هتتصلح إن شاء الله...
خالد: ربنا يسهل..
أحمد: طيب...يللا بقى لحسن أمي عايزة التليفون
خالد: طيب..سلام عليكم
أحمد: وعليكم السلام ورحمة الله وبركاته

ظل أحمد حائرا...ماذا حدث لخالد !!..ما الذي جعله في حالة يأس واكتئاب هكذا.. ؟؟
""أنا تعبت من نفسي والله""...ماذا يعني خالد بما قال..
خالد شاب محترم..والكل يشهد له بذلك..
صحيح أنه ليس في قمة الالتزام، وكلنا ذوو أخطاء، لكن ما الأمر...

الله أكبر اللـــــه أكبر
أذان العشاء

ذهب أحمد للصلاة وهو يفكر في كيف يلقى خالدا وماذا سيقول له..

بعد الصلاة..
أحمد (بوجه مبتسم) : السلام عليكم
خالد: وعليكم السلام ورحمة الله وبركاته..إزيك يا عم
أحمد: تمام..إزيك أنت...إيه الأخبار ؟
خالد: على كل حال
أحمد: كويس ؟
خالد: آه ..
أحمد (في خباثة): يا وااد..علي أنا برضه ؟؟...(ويربت على قدم خالد)..
خالد (مبتسما): ههه..والله يا أحمد ربنا يكرمك..
أحمد: طيب..تحب نروح حتة ولا نخللينا في المسجد ؟
خالد:...براحتك..خللينا هنا لغاية ما نشوف هنعمل إيه..
أحمد: طيب جميل..انوي الاعتكاف بقى...............ها يا عم..إيه الحكاية من طق طق لسلام عليكم
خالد ينظر للأرض في أسى..
أحمد: مالك يا عم بس..فهمني..
خالد:..أحمد..توعدني أني لو قلت لك مش هأنزل من نظرك ؟؟
أحمد باستغراب: أنت بتتكلم في إيه يا خالد !..أكيد لأ طبعا إن شاء الله...إيه يابني أنت نسيت أننا أصحاب من أكتر من خمس سنين ولا إيه..

خالد يصمت قليلا..ثم يرفع نظره في بطء إلى أحمد وينطق بكلمتين..كلمتين فقط لا غير...

فتنة النساء

انتظرونا غدا مع الحلقه الثانيه هنوضح ياعنى ايه فتنة النساء

الحلقة الثانية
"وما هي فتنة النساء ؟"

** وصلة الحلقة الأولى **



تعجب أحمد مما قاله خالد
فرغم أنه يعلم أن قضية فتنة النساء تعتبر أكثر القضايا حساسية بالنسبة للشباب والفتيات في مثل عمرهم، إلا أنه سماع هذه الكلمة من خالد كان بمثابة صدمة له..

هو لا يدري لماذا، فكلنا نعاني من فتنة النساء.. لكنه صدم وهذا ما حدث..

حاول أحمد أن يخفي تأثير الصدمة من وجهه حتى لا يتراجع خالد في حديثه بعد أن تعاهدا أن يتصارحا في كل ما يقولان..

أحمد في هدوء: طيب يا خالد.. هدي أعصابك وتعالى نفكر بمنطقية..
خالد: .........
أحمد: خالد.. لو فضلت بالشكل ده مش هنعرف نوصل لحاجة.. وصدقني هتتعب نفسك على الفاضي..
خالد: أحمد أنت مش حاسس بيا
أحمد في شفقة: والله حاسس بيك يا خالد.. إزاي تقول كده بس
خالد: طيب يا أحمد.. بس أنا تعبان بجد
أحمد: وأنا عارف أنك تعبان.. وصدقني مش لوحدك.. بس برضه لازم تهدأ عشان نفكر مع بعض
خالد: أديني هادي أهو.. هنعمل غيه بقى ؟؟

مرت لحظات صمت.. ثم رفع أحمد بصره في بطء تجاه خالد قائلا:
يعني إيه فتنة النساء ؟

خالد: ما شاء الله.. واضح أنك هتساعدني جامد..
أحمد: أنا باتكلم بجد.. عشان نعرف نحل مشكلة لازم ندرسها كلها من أولها لآخرها.. يعني إيه فتنة النساء ؟؟
خالد مشاكسا: يعني النساء عاملين فتنة
أحمد يفكر بعمق: يا عم بجد.....فتنة النساء يعني

يا بييييه !

كان هذا الصوت هو صوت خادم المسجد معلنا وقت الرحيل..
أحمد مستفهما: ؟؟؟؟
خادم المسجد: هنقفل المسجد
خالد: أنا مصليتش السنّة لسه
خادم المسجد: صليها في البيت
خالد: بس أنا...
أحمد مقاطعا: خلاص يا خالد تعالى.. سلام عليكم يا حاج

خرج أحمد وخالد من المسجد ووقفا بجواره

أحمد: ماتبقاش تعاند معاه.. هو ملوش ذنب أنت عارف
خالد: بس.. طيب
أحمد: كنا بنقول إيه؟
خالد: كنا بنكتشف إيه هي فتنة النساء
أحمد: آه.. بص يا سيدي.. فتنة النساء دي شهوة..

فتنة النساء دي شهوة.. ومش لازم شهوة يعني شهوة جنسية.. لكن زي ما الأكل والشرب شهوة.. والنوم شهوة..
يعني حاجة الإنسان بيشتهيها..
ربنا سبحانه وتعالى خلق الإنسان نوعين ذكر وأنثى.. وخلق في كل نوع منهم ميل فطري تجاه النوع التاني..

وعلى فكرة الميل ده مش لازم يكون شهوة بس، وقصدي بـ"شهوة" هنا يعني الجنس يعني أو قضاء الوطر.. لكن الميل العاطفي برضه ليه دور.. ودور كبير كمان..

فالميل اللي بين الولد والبنت أو الراجل والست عامة، ماينفعش أننا نمنعه ولا نقضي عليه.. ده مش حل..
وانت عارف ان ديننا الإسلام دين الوسطية.. بيتعامل مع احتياجات الإنسان وشهواته المعاملة الصحيحة.. لأن ربنا سبحانه وتعالى خبير بشؤوننا.. فهو أعلم بحالنا وأعلم بمصلحتنا.. وبالتالي الإسلام جاء مش بيقضي على الميل الفطري ده لكن بيوجهه صح..

يعني ولا صح الواحد يقضي شهواته زي ما هو عايز، ولا صح يكبتها تماما.. لكن ربنا سبحانه وتعالى جعل للشهوة دي متنفس شرعي اللي هو الزواج..

خالد: متهيألي مش محتاج أقولك أن ظروفي ماتسمحش بالجواز دلوقتي
أحمد: عارف.. أنا بس بأتناقش معاك

بس فكمقدمة عايزك تفهم أننا مش بنفكر في طريقة للقضاء على الشهوة قضاء نهائي ونعيش مرتاحين وآخر حلاوة.. لكن الموضوع كله جهاد من أوله لآخره..
مفيش حل كده بسيط.. مش دوا هو هتاخده يخليك تبطل نظر للنساء ولا تبطل انجذاب ليهم..

خالد: جميل.. وأنا يا سيدي مشكلتي أني واللــــه بأجاهد.. بس دايما، أو نقول غالبا عشان أبقى صادق، بأقع وأرجع تاني زي الأول وأزفت..

أحمد: من أدمن القرع يوشك أن يفتح له
خالد: مين ؟
احمد: هههه.. من ادمن القرع يوشك أن فتح له.. يعني اللي يفضل يقرع الباب، يخبط عليه يعني، لازم هيتفتح له في يوم من الأيام إن شاء الله
خالد: طيب يا خويا.. وبعدين
أحمد: وبعدين دلوقتي أنا اتأخرت وأبويا هيستغرب وممكن يتضايق مني.. فبعد إذنك ومن غير زعل.. ممكن نكمل بكرة ؟؟
خالد: بس احنا ماقلناش أي حاجة لسه يا أحمد
أحمد: عارف والله.. بص.. اعتبر كلامنا ده كله تمهيد وأننا لسه ما دخلناش في الموضوع.. وإن شاء الله أوعدك أننا هنتكلم كتير وبإذن الله هنوصل لحل مع بعضنا..
خالد في يأس: ............
أحمد: خلاص بقى عشان خاطري.. فرفش بقى
خالد: ربنا ييسر يا أحمد.. بس بالله عليك ادعيلي لأني بجد تعبان
أحمد: والله بأدعيلك يا عم.. وهأدعيلك كمان إن شاء الله... يللا بقى لحسن بابا يزعل بجد..
خالد: طيب هاشوفك بكرة امتى إن شاء الله ؟
أحمد: أنا الصبح هأكون في مشوار... خليها بعد العصر في المسجد إن شاء الله
خالد ضاحكا: عشان ننطرد تاني
أحمد: يا سيدي... يللا يا عم.. اي خدمة ؟
خالد: ربنا يكرمك يا أحمد.. أنا آسف على تعبك
أحمد: بس يلا.. يللا السلام عليكم
خالد: وعليكم السلام ورحمة الله وبركاته

نلقاكم الحلقة الثالثة إن شاء الله تعالى

الحلقة الثالثة
"لازم تطهر قلبك الأول يا خالد"

في اليوم التالي بعد صلاة العصر مباشرة في المسجد، نظر خالد حوله باحثا عن صديقه أحمد..
ظل يبحث عنه وينظر لكن بدون جدوى

بقى كده يا أحمد.. بتديمبة..ني زو.بس لما أشوفك..

فكر خالد مغتاظا.. هل نسي أحمد الميعاد أم ماذا حدث.. لكنه لما خرج من المسجد تفاجأ بأحمد ينتظره بالخارج

أحمد ضاحكا: السلام عليكم.. إيه يا عم.. العصر ملوش سنة بعده.. كنت فين كل ده؟
خالد متعجبا: أنا اللي كنت فين ! انا عمال أدور عليك جوه
أحمد: بجد ؟!.. أنا آسف، أنا افتكرتك هتفهم إني مستنيك بره المسجد.. معلش
خالد: ولا يهمك يا عم.. المهم إيه أخبارك
أحمد: تمام.. أخباك أنت إيه
خالد: خير ..
أحمد: ها.. هنقف هنا برضه ولا تحب نتمشى ؟
خالد: اللي تشوفه
أحمد: انجز يا عم
خالد: طيب طيب.. تعالى نتمشى أحسن.. مش ناقصين فضايح هنا..
أحمد: .. ماشي

تحرك خالد برفقة أحمد تجاه أحد الشوارع شبه الهادئة وبدأ أحمد الحوار قائلا

أحمد: ها يا عم.. لسه تعبان نفساويا ؟
خالد: اتريق براحتك.. ما أنت مش حاسس بيا
أحمد: ييييييه.. يا عم والله العظيم حاسس وفاهم ومقدّر.. بأهزر يا خالد بأهزررررر
خالد: هههه طيب يا عم بالراحة
أحمد: ده أنت إيه ده
خالد: ربنا يكرمك يا أحمد أنا عارف إني تاعبك معايا
أحمد: معلش.. ابقى ادفعلي فلوس يا سيدي.. ممكن نتكلم جد بقى ؟
خالد: اتفضل
أحمد: دلوقتي يا خالد أنا كل اللي فهمته منك امبارح أن موضوع فتنة النساء ده تاعبك
خالد: جدا
أحمد: تمام.. بس مفهمتش تقصد إيه بالظبط بحكاية فتنة النساء دي.. يعني غض البصر ولا الاختلاط ولا الكلام مع البنات ولا إيه بالظبط
خالد: أكيد كل ده مش كويس وبيكمل بعضه.. بس كنت أقصد نقطة غض البصر بالذات
أحمد: آه
خالد: أنت شايف يا أحمد البنات في الكلية أو في الشارع وفي التلفزيون وفي النت وفي كل حتى بقوا عاملين إزاي
أحمد: للاسف
خالد: أنا عارف أن دي مش مشكلتي لوحدي، بس أنا فعلا تعبان يا أحمد.. نفسي أرتاح بقى
أحمد: معلش يا خالد.. حياة الحياة كده لازم يكون فيها تعب ومشقة وجهاد.. أمال أنت عايزها جنة ؟
خالد: لا يا أحمد مش جنة ولا حاجة.. بس أنا مش عارف الشباب التانيين عايشين إزاي
أحمد: فيه ناس كتيرة منفضة يا خالد ومش هاممها الموضوع ده.. تغض ماتغضش، تصاحب ماتصاحبش.. مش فارقة كتير معاها..
أن احنا بفضل الله عز وجل مش من النوعية دي.. لأن دول أصلا مش حاسين أنهم بيعملوا حاجة غلط

خالد: رب العالمين.. طب نعيش إزاي
أحمد:.....
خالد: أغض بصري إزاي يا أحمد.. فهمني
احمد: بص يا خالد.. واهدأ وماتتنرفزش عشان الناس بتبص علينا.. ماينفعش تبدأ بغض البصر وأنت بالشكل ده
خالد: يعني إيه
أحمد: يعني ماتزعلش مني، بس إيه اللي يحصل لو انت غضيت بصرك وأنت اصلا مخك مليان صور.. هتفرق إيه ؟؟.. هتغضه إزاي أصلا وأنت قلبك متشرب الصور دي..

خالد: يعني إيه برضه ؟
أحمد: يعني أنت كده بتعالج أعراض يا خالد.. مش بتعالج المرض نفسه..
غض البصر مهم جدا طبعاااااا.. وأمر من الله عز وجل لازم نلتزم بيه.. بس ماينفعش تبقى الحاجة الوحيدة اللي تعملها هي غض البصر وتفتكر أن ده هيخلصك من كل مشاكلك كده..

بص يا خالد.. إيه رأيك في واحد راح للدكتور قال له يا دكتور أنا عيان..
قاله حاسس بإيه، قاله حاسس بسخونية وصداع... راح الدكتور اداله دوا للسخونية والصداع..
خده وارتاح شوية، بس بعدين تعب تاني

ليه.. لأن الدكتور واجه أعراض المرض، لكن مادورش إيه هي أسباب المرض نفسه عشان يواجهها..
فيه حاجة أهم من علاج السخونية والصداع وهي أنه يكشف عليه ويشوف.. ممكن يكون فيه مرض خطير وهو مش عارف... ربنا يحفظنا..


وضعك ووضعي ووضع كل الشباب دلوقتي كده يا خالد

خالد: طب إزاي ؟ إيه علاقة اللي بتقوله ده بموضوعنا ؟
أحمد: علاقته أن دلوقتي تعالى نتكلم عامة، عن واحد غرقان في بحور الشهوات وضايع من أوله لآخره... وعايز ينتشل نفسه من اللي هو فيه... هل أول خطوة يعملها هي غض البصر؟؟

طب هيغض بصره إزاي وهو قلبه أصلا متنيل على عينه.. ولو غض طب ما قلبه وعقله فيه من الصور والأفلام والمواقف ما يكفيه لأنه يرجع تاني للضياع..

إذن الحل، أنه يبدأ بقلبه الأول..
أو بمعنى اصح يهتم بقلبه مع طبعا غض البصر وكده

لازم ينضف قلبه الأول ويطهره علشان يقدر يغير حياته فعلا..

التخلية قبل التحلية يا خالد.. زي اللي يجيب كوباية مش نضيفة وعايز يشرب فيها.. مش كفاية أن المية تكون نضيفة.. لازم الكوباية نفسها - الوعاء اللي هتتحط فيه المية - تكون نضيفة هي كمان

قلبك لازم يكون نضيف علشان يستقبل كلام الله عز وجل ويستشعره ويعيه وينفذه
لازم تطهر قلبك الاول يا خالد..

خالد: طب وهل القلب فعلا هو البداية الصحيحة ؟؟ هل القلب هو الأهم ؟؟

أحمد: ربنا سبحانه وتعالى بيقول: ((يَوْمَ لا يَنْفَعُ مَالٌ وَلا بَنُونَ * إِلا مَنْ أَتَى اللَّهَ بِقَلْبٍ سَلِيمٍ))
وكمان قال رسول الله صلى الله عليه وسلم: ((ألا وإن في الجسد مضغة : إذا صلحت صلح الجسد كله ، وإذا فسدت فسد الجسد كله ، ألا وهي القلب)) في جزء من حديث رواه البخاري

خالد: جميل جدا يا أحمد.. بس دلوقتي أنا لو اهتميت بقلبي وحاولت أطهره وأنا لسه مش بأغض بصري ما أنا هأفسده تاني
أحمد: يلا لأ.. أنا مش بأقول طهر قلبك واقعد بص للنساء لغاية ما تطهره بعدين ابقى غض.. لأ طبعا.. أنا قصدي تهتم بتطهير القلب وتركز عليه، مع كمان غض البصر طبعا
خالد: طب وموضوع تطهير القلب ده.. سهل ولا إيه النظام ؟
أحمد: ماتقلقش.. ربنا هييسر لك بإذن الله.. وزي ما قلتلك كل حاجة محتاجة جهاد وصبر وتعب وو.. ومفيش حاجة هتبقى سهلة..
خالد: طيب انا اقتنعت.. ربنا يكرمك يا أحمد.. أطهره إزاي بقى ؟؟؟؟؟
أحمد: أنت كده عايز خطة إيمانية تمشي عليها.. عايزين نرفع مستوانا الإيماني.. لازم نكثر من العبادات.. لازم دعاء وتضرع.. لازم تبدأ تحفظ القرآن.. لازم قيام ليل... لازم...
خالد مقاطعا: أحمد ! بالراحة يا عم أنت هتعقدني من أولها.. بالراحة الله يكرمك عشان اقدر.. مش هينفع أشتغل في كل حاجة مع بعض كده
أحمد: طيب خير.. بص... فيه شريط كان الشيخ هاني حلمي ربنا يحفظه عامله اسمه "طهر قلبك".. إيه رايك أنا وأنت نسمع الشريط ده ونتناقش فيه إن شاء الله ؟؟
خالد: يا ريت.. بس أنا كان نفسي نحط خطة زي ما قلت
أحمد: هنحط إن شاء الله.. بس نسمع الشريط الاول عشان يبقى عندنا دافع قوي ومعلومات كفاية بإذن الله
خالد: جميل
أحمد: إن شاء الله لما أروح هأبعتلك وصلة الشريط في إيميل
خالد: ربنا يكرمك يا أحمد.. جزاك الله خيرا
أحمد: جزانا وإياكم يا عم.. يللا نرجع بقى لحسن أنا تعبت من كتر المشي..
خالد: أوكييييييييي


وهكذا بدأ أحمد وخالد رحلة العودة إلى بيتيهما مرة أخرى

نلقاكم في الحلقة الرابعة إن شاء الله
مع شريط "طهر قلبك"

الحلقه 4
السلام عليكم ورحمة الله وبركاته..

أقدم لكم هذه المحاضرة الرائعة بكل ما تحتويه الكلمة





لن أطيل عليكم






طهر قلبـــــك

الحلقة الخامسة
"كل شيء.. راح"


مر أسبوع كامل على أحمد لم يتواصل فيه مع خالد.. رغم اتصال أحمد مرتين به وعدم رد خالد المستمر..
فظن أن لديه عذرا ما وقرر الانتظار حتى تتضح الأمور أكثر..

وذات يوم بينما يفتح أحمد الماسنجر الخاص به إذا بخالد متصل باسم "كل شيء راح"
قلق أحمد من الاسم وبدأ معه محادثة نصية


Nudge !
رب اغفر لي: السلام عليكم ورحمة الله وبركاته
خالد أنت هنا ؟
.
.
.رب اغفر لي: خالد ؟؟
بجد لو موجود رد عليا أنا قلقت عليك بجد..

كل شيء راح: وعليكم السلام ورحمة الله وبركاته
رب اغفر لي: فيه إيه يا خالد مالك.. شكلك مش طبيعي !
كل شيء راح: مفيش يا أحمد
عامل إيه أنت
رب اغفر لي: خالد !
كل شيء راح: أحمد بالله عليك سيبني في حالي.. بجد يا أحمد أنا تعبان شوية معلش
رب اغفر لي: اضغط على الصورة لرؤيتها بالحجم الطبيعي
خالد أنا بجد مش عايز أتقل عليك.. بس مقدرش أسيبك كده
كل شيء راح: معلش
رب اغفر لي: لا حول ولا قوة إلا بالله
.
.
كل شيء راح: أنت مش شايف اسمي ؟
رب اغفر لي: شايف والله يا خالد اضغط على الصورة لرؤيتها بالحجم الطبيعي
كل شيء راح: أمال عايز تعرف إيه تاني.. هو ده كل الموضوع.. كل شيء راح..
رب اغفر لي: طب ينفع تحكيلي ولا فيه مانع ؟
كل شيء راح: مش عارف والله يا أحمد.. بس أنا تعبان
أنا تعبان أوي يا أحمد
آآآه يا أحمد
رب اغفر لي: أنا مش بأتطفل عليك صدقني أنا بس نفسي أساعدك
كل شيء راح: يا أحمد.. ما أظنش هتقدر..
رب اغفر لي: اضغط على الصورة لرؤيتها بالحجم الطبيعي
طب فضفضلي وأنا مش هأتكلم ماشي ؟
.
.
.
ماشييييييي ؟؟؟؟؟
كل شيء راح: ماشي يا أحمد... ماشي...
.
.
أنا تعبان يا أحمد والله..
ياااااااه.. مش عارف نفسي في إيه..
لو كان الموت راحة كنت قلت لك نفسي أموت.. بس تبقى مصيبة لو مت.. وطلع الموت مش راحة يا أحمد اضغط على الصورة لرؤيتها بالحجم الطبيعي..


فاكر يا أحمد الحوار اللي كلمتني فيه كذا مرة ؟؟
موضوع القرف.. فتنة الـ.. النساء..

خلاص يا أحمد.. أنا اكتشفت أن الموضوع ده ملهوش حل..

يبدو أن أنا ضعت خلاص.. ننسى بقى موضوع ملتزم وشيخ والكلام ده.. كله كلام والله.. ماحدش عارف إيه اللي وراء المنظر اللي أنا فيه ده..


أحمد أنا حاسس أني حيوان.. عارف بجد.. بأحس أني **** مثلا أو حاجة كده..
بأحس أني مش إنسان مسلم.. بأحس أني عار أصلا على الإسلام..

تعرف؟؟.. والله مش عارف.. بس أنا حاسس بكده..

كأن ده مصيري وخلاص.. ولازم أستسلم للأمر الواقع..

بعد كده ماتقوليش يا خالد.. قل لي يا ****.. قل لي يا مفتون.. قل لي أي حاجة زفت..

رب اغفر لي: اضغط على الصورة لرؤيتها بالحجم الطبيعي

كل شيء راح: عارف أني كأبتك يا أحمد.. قلتلك من الأول سيبني في حالي مرضيتش..
رب اغفر لي: خالد بالله عليك اسكت.. كمل كلامك .. أنا مركز معاك والله

كل شيء راح: خلاص أنا معنديش كلام تاني عايز أقوله..
هي دي الخلاصة.. كل شيء.. انتهى..

رب اغفر لي: مش احنا يا خالد قلنا هنتكلم مع بعض في الحوارات دي وهنساعد بعضنا إن شاء الله؟
كل شيء راح: كله كلام يا أحمد..
رب اغفر لي: إزاي بس يا خالد
كل شيء راح: بصراحة وماتزعلش مني، هي دي الحقيقة.. شوف يا أحمد أنت كلمتني قد إيه وكام مرة.. وشريط وبتاع.. ربنا يكرمك.. بس إيه النتيجة ؟؟
رب اغفر لي: أنت سمعت الشريط ؟
كل شيء راح: آه والله
رب اغفر لي: طيب يا خالد يعني أنت ماشي في الطريق أهو.. أمال ليه نفسيتك في الأرض كده.. أنت.... ؟؟
كل شيء راح: ..
رب اغفر لي: أنت وقعت تاني يعني ؟؟
كل شيء راح: أيوة يا أحمد وقعت.. اتنيلت...سيبني بقى عشان أنا مش ناقص وأنا والله مكسوف منك بشكل معفن أصلا..
رب اغفر لي: يا سبحان الله.. احنا مش قلنا ننفض لموضوع الكسوف ده وتعتبرني زي دكتور ؟
آ.. آسف والله يا خالد.. مش قصدي دكتور.. قصدي نبقى صرحاء مع بعض عشان نعرف نساعد بعضنا بإذن الله ؟؟ ووعدتك أنك مش هتنزل من نظري ولا الكلام الفاضي ده ؟؟

كل شيء راح: ماشي يا أحمد..
رب اغفر لي: قل لي بقى.. أنت كل اللي فيه ده عشان خاطر وقعت في الذنب يعني ؟؟
كل شيء راح: أحمد أنت مش عارف.. ربنا يثبتك يا رب بس بجد دي حاجة وحشة أوي.. عارف لما تعمل المعصية.. والله بييجي لك غم وهم وقرف ينكد عليك حياتك كلها..
وبعدين كل ده يأثر على مذاكرتي ويأثر على علاقتي مع أهلي ويأثر على كل حاجة..
كله بسبب المعصية
رب اغفر لي: معاك حق والله
كل شيء راح: ربنا يعفو عني
رب اغفر لي: آمييييين يا رب وإيانا..

بس أنت ملكش حق في اللي بتعمله ده
كل شيء راح: ؟؟
رب اغفر لي: مش بأهوّن من مشكلتك والله.. بس يا خالد أنت عملت إيه يعني ؟؟ قتلت ؟؟ سرقت ؟؟؟ زنيت ؟؟؟ يا أخي احمد ربنا أنك لسه بتصلي وأنك بفضل الله لسه على التوحيد
كل شيء راح: كلامك عجيب يا أحمد !! ما هو ده اللي ناقص اللي أنت بتقوله ده !!!!
رب اغفر لي: أنت فهمتني غلط.. أنا مش قصدي أنك عملت ذنب بسيط.. لأ طبعا... ومش بأقولك احكيلي عملت إيه بالتفصيل.. أنا فاهمك صدقني..
لكن أنا قصدي إذا كان ربنا سبحانه وتعالى يقبل التوبة من اللي بيقتل ويسرق ويزني.. يبقى مش هيقبل التوبة منك يا خالد ؟؟
كل شيء راح: يا أحمد ماشي حتى لو تبت.. ما أنا بأرجع تاني يوم إيه اللازمة يعني !
رب اغفر لي: إزاي بقى يا خالد !.. تأكد أنك طول ما أنت بتجاهد نفسك ربنا مش هيخذلك.. أبدا
كل شيء راح: أحمد كلمني بمنطقية.. كلمني على قد عقلي يا عم... إيه لازمة إني أجاهد مليون يوم وبعد كده اقع في الآخر.. إيه اللازمة بقى ؟؟!
رب اغفر لي: خالد.. هدي نفسك عشان نعرف نتفاهم.. ربنا سبحانه وتعالي يقول ((والذين جاهدوا فينا لنهدينهم سبلنا)).. وأنت تقول لي إيه اللازمة !
وبعدين من قالك أن ربنا يريد منك النتيجة ؟؟ أنت دايما ناسي أن ربنا سبحانه هو الخبيييييير يا خالد.. هو العليم.. هو اللي خلقك وعارفك وعارف تركيبك وأسلوبك وكل حاجة فيك ؟؟
ربنا سبحانه أمرنا أننا نجاهد.. وأننا نسعى (وأن ليس للإنسان إلا ما سعى).. وأننا نبدأ وأننا نحاول وأننا ننوي وأننا ناخد بالأسباب وأننا نتوكل عليه وأننا نعمل كل حاجة نقدر نعملها.. لكن طالما أنت في الطريق يبقى ماينفعش تيأس !

كل شيء راح: يعني أنت عايز تقول أني طالما بأحاول واجاهد، إني لو وقعت في الذنب مش عليا وزر ؟؟
رب اغفر لي: أنا مقلتش كده يا عم.. هتوديني في داهية اضغط على الصورة لرؤيتها بالحجم الطبيعي.. أنا قلت طالما بتجاهد يبقى ما تياسش.. لأن اليأس أصلا هيرجعك لورا.. والشيطان هيقولك أديك حاولت ستين مرة وكل مرة تقع، مفيش منك فايدة.. استفدنا إيه بقى من اليأس ؟؟ قتل همتك وعزيمتك وبوظلك كل حياتك...
وعلى فكرة فيه فرق بين الندم على المعصية اللي هو شرط من شروط التوبة، وبين اليأس اللي أنت فيه دلوقتي.. عشان ماتقوليش مش عايزك تتوب اضغط على الصورة لرؤيتها بالحجم الطبيعي

كل شيء راح: طب اعمل إيه يا أحمد بس.. كتر المحاولات واستمرار الفشل بيخليني فعلا أيأس..
أنا بشر برضه وعندي مشاعر

رب اغفر لي: ماحدش بيقولك تخلى عن بشريتك.. لكن هي دي سنة الله في الكون.. زي ما احنا بشر وعندنا أحاسيس، ربنا خلقنا بشر مش معصومين.. وجعل الشيطان والنفس والهوى ضدنا.. وأمرنا بالجهاد والصبر على المعاصي.. وجعل ثواب اللي يصبر في الدنيا أنه ينعم في الجنة.. ولا أنت عايز الجنة ببلاش

كل شي راح : اضغط على الصورة لرؤيتها بالحجم الطبيعي
رب اغفر لي: خالد معقولة أنا اللي هأفكرك ؟؟ نسيت قول الله عز وجل "قل يا عبادي الذين أسرفوا على أنفسهم لا تقنطوا من رحمة الله إن الله يغفر الذنوب جميعا إنه هو الغفور الرحيم"

نسيت قول رسول الله صلى الله عليه وسلم: (ما من عبد مؤمن إلا و له ذنب ، يعتاده الفينة بعد الفينة ، أو ذنب هو مقيم عليه لا يفارقه ، حتى يفارق الدنيا ، إن المؤمن خلق مفتنا ، توابا ، نسيا ، إذا ذُكِّرَ ذَكَر) والحديث صححه الألباني
ليك ذنب يا خالد.. ومفتن ونسيّ.. لكن تواب.. وإذا ذُكّرت ذكرت..

كل شيء راح: يا رب اغفر لي
رب اغفر لي: ده المؤمن يا خالد مش المسلم كمان !.. يا سبحان الله..

وشوف قول رسول الله صلى الله عليه وسلم في الحديث.. استنى أدور لك عليه..
.
.
.
قال رسول الله صلى الله عليه وسلم: (إن عبدا أصاب ذنبا ، وربما قال : أذنب ذنبا ، فقال : رب أذنبت ، وربما قال : أصبت ، فاغفر لي ، فقال ربه : أعلم عبدي أن له ربا يغفر الذنب ويأخذ به ؟ غفرت لعبدي ، ثم مكث ما شاء الله ثم أصاب ذنبا ، أو أذنب ذنبا ، فقال : رب أذنبت - أو أصبت - آخر فاغفره ؟ فقال : أعلم عبدي أن له ربا يغفر الذنب ويأخذ به ؟ غفرت لعبدي ، ثم مكث ما شاء الله ، ثم أذنب ذنبا ، وربما قال : أصاب ذنبا ، قال : قال : رب أصبت - أو قال : أذنبت - آخر فاغفره لي ، فقال : أعلم عبدي أن له ربا يغفر الذنب ويأخذ به ؟ غفرت لعبدي ، ثلاثا ، فليعمل ما شاء) رواه البخاري

كل شيء راح: رب أذنبت فاغفر لي اضغط على الصورة لرؤيتها بالحجم الطبيعي
رب اغفر لي: ولا حديث قاتل المائة نفس.. ولا الحديث القدسي "قال الله تعالى : يا ابن آدم إنك ما دعوتني و رجوتني غفرت لك على ما كان فيك و لا أبالي ، يا ابن آدم لو بلغت ذنوبك عنان السماء ثم استغفرتني غفرت لك و لا أبالي ، يا ابن آدم إنك لو أتيتني بقراب الأرض خطايا ثم لقيتني لا تشرك بي شيئا لأتيتك بقرابها مغفرة" والحديث حسن يا خالد
.
.

رب اغفر لي: عارف يا خالد... تعرف أن الياس والقنوط من رحمة الله دي من أعظم الذنوب عند ربنا ؟
كل شيء راح: بجد ؟
رب اغفر لي: آه بجد.. الشيخ هاني حلمي كان قال كده في شريط نفسي أتوب.. شريط حلو ابقى اسمعه
كل شيء راح: تاني اضغط على الصورة لرؤيتها بالحجم الطبيعي
رب اغفر لي: يا سلااااااام.. إيه الجمال ده يا خواتي.. أبو الهول نطق اضغط على الصورة لرؤيتها بالحجم الطبيعي
كل شيء راح: يا معفن اضغط على الصورة لرؤيتها بالحجم الطبيعي
رب اغفر لي: هههه... ممكن بقى تغير اسمك ده لأنه يجيب اكتئاب لوحده أصلا... اضغط على الصورة لرؤيتها بالحجم الطبيعي
كل شيء راح: طب استنى
.
.
.
رحماك: إيه رأيك كده ؟
رب اغفر لي: يا سلااااااااااام.. فرق كبير جدا...
رحماك: بس أنا كنت فيه كذا نقطة عايز أسألك فيها..
رب اغفر لي: كل نقطة بخمسين قرش اضغط على الصورة لرؤيتها بالحجم الطبيعي
رحماك: ه.. ماشي

بص يا سيدي..

نلقاكم فى الحلقة السادسة

الحلقة السادسة

هل أنا مُصر؟



رحماك: ه.. ماشي

بص يا سيدي..
أنا كان فيه كذا سؤال بيدور في ذهني بخصوص موضوع التوبة ده..
أنا عارف أن ربنا سبحانه وتعالى غفور رحيم.. وأنه يقبل توبة العبد ما لم يغرغر.. وأحاديث كتيرة جميلة عن التوبة.. لكن زي ما قلتلك كتر الوقوع بيولد إحباط..
فكنت عايز أسألك في كام نقطة، بس معلش تصبر عليا

رب اغفر لي: اتفضل يا عم.. كلي ودان صاغية

رحماك: ماشي.. أول حاجة، المقولة تقول لا صغيرة مع الإصرار ولا كبيرة مع الاستغفار.. طيب معنى كده أن أنا لما أنظر نظرة حرام أو أعمل أي ذنب عامة، بعدين أتوب منه، بعدين ارجع أقع فيه تاني.. يبقى كده وقعت في كبيرة ؟

رب اغفر لي: كبيرة؟ .. إزاي ؟
رحماك: عشان مصر عليها يعني..
رب اغفر لي: لا يا عم الموضوع مش كده.. أنت لما بتعمل الذنب.. هل بتتوب منه بجد ؟
رحماك: أيوة
رب اغفر لي: يعني بتكون ناوي فعلا على عدم العودة، ولا بتبقى نص نص؟
رحماك: لأ بأكون ناوي بجد.. بس بعدين بأضعف وبأقع تاني
رب اغفر لي: ماشي، بس المهم بتكون ناوي على عدم العودة، وبتحقق شروط التوبة الثلاثة (الندم، الإقلاع عن الذنب، العزم على عدم العودة)..يبقى أنت تبت بفضل الله.. لو ضعفت ووقعت تاني بقى ده مش إصرار..

رحماك: إزاي ما أنا وقعت في نفس الذنب؟
رب اغفر لي: لأ صدقني.. استنى أنا كان فيه فتوى تقريبا قريتها ليها علاقة بالموضوع ده.. ثانية كده معلش
رحماك: طيب بس بسرعة لحسن العصر قرب وأنا عندي أسئلة تاني
رب اغفر لي: ثواااااااااان
.
.
.
رحماك: أحمد ؟؟
Nudge

رب اغفر لي: أنا جيت
رحماك: أخيرا.. كنت بتجيب الفتوى من مدغشقر اضغط على الصورة لرؤيتها بالحجم الطبيعي
رب اغفر لي: هههه
معلش..

أهو بص يا سيدي.. ""ويعتبر العبد مصرا إذا لم يقلع عن المعصية ولم يتب منها ويندم على فعلها، أما من أقلع عن المعصية وتاب منها وندم على فعله لكنه عاد إليها بعد ذلك لضعفه البشري فإن هذا لا يعتبر مصرا، فإن تاب تاب الله عليه، وقد قال النبي صلى الله عليه وسلم: ما أصر من استغفر وإن عاد في اليوم سبعين مرة. رواه أبو داود والترمذي وغيرهما وحسنه بعض أهل العلم وضعفه بعضهم.""رحماك: ما شاء الله لا قوة إلا بالله.. ده كلام جميل أوي اضغط على الصورة لرؤيتها بالحجم الطبيعي

المهم..
الكلام في الفتوى بيقول إن التوبة ثم الذنب ثم التوبة وهكذا، لا يعتبر إصرارا.. على فكرة مقولة "لا صغيرة مع الإصرار ولا كبيرة مع الاستغفار" قالها سيدنا ابن عباس رضي الله عنه..
رحماك: رب العالمين.. ربنا يكرمك يا حمادة..
بالنسبة لتاني سؤال..

رب اغفر لي: استنى.. بص برضه على الفتوى دي لقيتها وأنا بأدورلك على الأولى.. برضه أخ بيسأل هل تكرار الذنب والتوبة يعتبر إصرار ولا لأ.. والجواب فيه كلام كثير جميل ومفيد..
رحماك: طب هأشوفها بعدين.. بالنسبة للسؤال التاني
رب اغفر لي: خالد.. ما تضيعش الموضوع اضغط على الصورة لرؤيتها بالحجم الطبيعي.. روح اقرأ الفتوى وأنا مستنيك
رحماك: طيب يا رخم اضغط على الصورة لرؤيتها بالحجم الطبيعي
.
.
.
رحماك: رب العالمين.. قريتها.. جزاكم الله خيرا يا شيخ
رب اغفر لي: جزانا وإياكم وبطل تريقة اضغط على الصورة لرؤيتها بالحجم الطبيعي
ها كنت عايز إيه كمان

رحماك: كنت بأقولك يا سيدي.. دلوقتي احنا عرفنا أن بفضل الله تكرار الذنب مع التوبة مش إصرار.. جميل..
لكن سؤالي، موضوع تكرار الذنب ده مش يعتبر عدم صدق مع ربنا في التوبة ؟

رب اغفر لي: يا بني ما أنا قلتلك.. لو الواحد بيتوب كده أي كلام وهو عارف أنه هيعمل الذنب تاني يبقى طبعا غلط.. لكن لو بيتوب بجد وبينوي فعلا أنه ما يرجعش لكن تغلبه نفسه الأمارة بالسوء ويضعف وكده.. فسبحان الله كلنا بشر بنخطئ..

رحماك: ماشي بس برضه
رب اغفر لي: أنت مش هتستريح غير لما أجيبلك كلام منقول، صح ؟
رحماك: بصراحة آه اضغط على الصورة لرؤيتها بالحجم الطبيعي.. معلش والله يا أحمد
رب اغفر لي: بس يلا.. استنى بقى شوية..
.
.
.
رب اغفر لي: امسك يا تاعبني..
إنسان أذنب ثم تاب ثم كرر نفس الذنب و تاب وهكذا بحيث أنه يكرر الذنب مع أنه يريد الإقلاع عنه فهل تقبل توبته وماذا يفعل حتى يبقى على هذه التوبة دون الرجوع لهذا الذنب؟
والجواب هنا (ماتخافش قصير مش زي اللي فاتت)

رحماك: ااااااااااااااااا جزيلاااااااااا..
معلش والله ماتزعلش.. بس أنا فعلا محتاج للفتاوى دي يا أحمد..
إن شاء الله في ميزان حسناتك يا عم..

رب اغفر لي: يا رب يا خويا..

رحماك: طيب هو فاضل كمان سؤال بصراحة..
رب اغفر لي: قول يا عم


الله أكبر الله أكبر

رحماك: اضغط على الصورة لرؤيتها بالحجم الطبيعي
رب اغفر لي: العصر أذن اضغط على الصورة لرؤيتها بالحجم الطبيعي
تلحق تقول بسرعة ؟

رحماك: لا ياعم أنا عايزك تركز.. طب بص..
مش عارف

بص أنا هأقولك موضوع السؤالوتبقى تدور على الرد بتاعه وتقوله لي بعدين إن شاء الله.. ماشي؟
رب اغفر لي: ماشي إن شاء الله
رحماك: السؤال هو عن الحديث اللي بيقول "إذا خلوا بمحارم الله انتهكوها".. عارفه؟ اللي هو ناس بتيجي بأعمال عظيمة زي جبل تهامة..

رب اغفر لي: أيوة أيوة عارفه.. إيه السؤال؟
رحماك: كنت عايز أعرف لأني سمعت الحديث ده من زمان ومن ساعتها متحير.. هل المقصودين بالحديث ده هم اللي بيقعوا في الذنوب لما يبقوا لوحدهم، ولا الحديث يقصد أنه بيمثل قدام الناس أنه ملتزم لكن لوحده بيظهر على حقيقته ؟

يعني هل لو واحد فعلا بيحاول يلتزم ويصلي ويصوم ويتصدق وو.. بس ساعات يضعف لوحده لما يكون في خلوة.. يبقى بينطبق عليه الحديث ده، ولا إيه..

رب اغفر لي: آه فهمتك..
رحماك: أصل لو كده تبقى كارثة يا أحمد اضغط على الصورة لرؤيتها بالحجم الطبيعي

رب اغفر لي: طيب أنا معرفش، بس هأدورلك إن شاء الله وأقولك في أقرب فرصة بإذن الله..
رحماك: ربنا يعزك يا رب.. معلش أنا طولت عليك اوي يا أحمد
رب اغفر لي: أنت هتصلي فين ؟
رحماك: هاصلي في المسجد اللي جنبنا إن شاء الله..
رب اغفر لي: مش هأشوفك في الصلاة يعني؟
رحماك: لا يا عم ربنا يعزك.. أنتم المسجد اللي عندكم بيطول أوي اضغط على الصورة لرؤيتها بالحجم الطبيعي
رب اغفر لي: هههه.. طيب يا خويا..
أي خدمة ؟
رحماك: تشكرررررررر
رب اغفر لي: ادعيلي بقى لحسن أنا حالي مش متظبط أوي..
رحماك: ربنا يكرمك ويعزك ويحفظك ويعينك وييسر لك أمرك ياااااااا رب
رب اغفر لي: آمين.. وبظهر الغيب بقى.. يللا.. السلام عليكم ورحمة الله وبركاته
رحماك: وعليكم السلام ورحمة الله وبركاته
سبحانك اللهم وبحمدك نشهد أن لا إله إلا أنت نستغفرك ونتوب إليك


نلقاكم في الحلقة السابعة بإذن الله تعالى

الحلقة السابعة
إذا خلوا بمحارم الله انتهكوها



اليوم التالي كان يوم سبت.. وهو إجازة في كلية أحمد وخالد..
وعادة في أيام الإجازة يحب أحمد أن يجلس على الكمبيوتر بعد أن يرجع من صلاة الفجر ليمارس بعض أعماله عليه، وهو يرى أن وقت ما بعد الفجر أنسب الأوقات للجلوس على الجهاز بدلا من النوم ثانية..

بعد أن راجع أحمد قائمة الإيميلات الخاصة به، تذكر ما وعد خالد به بخصوص البحث عن المقصود بحديث "إذا خلوا بمحارم الله انتهكوها".. ففتح الشبكة الإسلامية كعادته وبدأ في البحث..

..
بعد بعض المحاولات توصل أحمد إلى عدة فتاوى تناسب ما يريده..

" رب العالمين"..

فكان مما وجده:

السؤال
السلام عليكم ، أردت أن أسأل عن الحديث الشريف ( يؤتى يوم القيامة برجال لهم أعمال كجبال تهامة ييضا فيجعلها الله هباء منثورا،لأنهم كانوا إذا اختلوا بمحارم الله انتهكوها) هل المقصود بذلك المبتلى بمعصية ولكنه لا يجاهر فيها بين الناس. وجزاكم الله خيرا.

الفتوى
والصلاة والسلام على رسول الله وعلى آله وصحبه أما بعد: ‏

فالحديث أخرجه ابن ماجه في سننه عن ثوبان رضي الله عنه عن النبي صلى الله عليه ‏وسلم أنه قال " لأعلمن أقواماً من أمتي يأتون يوم القيامة بحسنات أمثال جبال تهامة ‏بيضاً، فيجعلها الله عز وجل هباء منثوراً". قال ثوبان: يا رسول الله صفهم لنا، جلهم ‏لنا، أن لا نكون منهم ونحن لا نعلم. قال: "أما إنهم إخوانكم ومن جلدتكم، ‏ويأخذون من الليل كما تأخذون، ولكنهم أقوام إذا خلوا بمحارم الله انتهكوها" والمراد ‏بهؤلاء: من يبتعد عن المعصية ويتظاهر بالصلاح مراعاة للناس، وأمام أعينهم، وبمجرد ‏أن يخلو بنفسه ويغيب عن أعين الناس سرعان ما ينتهك حرمات الله، فهذا قد جعل ‏الله سبحانه أهون الناظرين إليه، فلم يراقب ربه، ولم يخش خالقه، كما راقب الناس ‏وخشيهم، أما من يجاهد لترك المعاصي، ولكن قد يضعف أحياناً من غير مداومة على ‏مواقعة المحرمات، ولا إصرار عليها، فيرجى ألا يكون داخلاً في ذلك.‏
والله أعلم.‏

--------------

ووجد أيضا فتوى لأخ يسأل عن الجمع بين هذا الحديث وبين حديث الأمر بعدم المجاهرة بالمعاصي..

السؤال
بسم الله الرحمن الرحيم
سؤالي عن معنى حديث للنبي صلى الله عليه وسلم والذي فيما معناه (أنه يأتي أقوام يوم القيامة بحسنات كالجبال فيجعلها الله هباءً منثورًا، فقيل: عرفهم لنا يا رسول الله فقال: هم قوم إذا خلوا بمحارم الله اتنهكوها .... ) وعن معنى حديث آخر وهو (كل أمتي معافاً إلا المجاهرون... ) , فأنا في
حيرة بين الحديثين , فإذا فعلت معصية وكنت معتاداً عليها في الخفاء وهي لا تفعل إلا في الخفاء ولم أحدث بها فأي الحديثين ينطبق على حالتي؟؟؟
وجزاكم الله خيراً.

الفتوى
والصلاة والسلام على رسول الله وعلى آله وصحبه أما بعد:

فقد روى البخاري ومسلم واللفظ لـ البخاري عن أبي هريرة رضي الله عنه قال: سمعت النبي صلى الله عليه وسلم يقول: كل أمتي معافى إلا المجاهرين وإن من المجاهرة أن يعمل الرجل بالليل عملا ثم يصبح وقد ستره الله فيقول يا فلان عملت البارحة كذا وكذا وقد بات يستره ربه ويصبح يكشف ستر الله عنه.
فالذي يجاهر بمعصيته أمام الناس، والذي يحدث الناس بما فعله من منكرات يكون قد أضاف إلى ذنبه ذنباً آخر كما قال الحافظ ابن حجر في الفتح: قد ارتكب محظورين: إظهار المعصية، وتلبسه بفعل المُجَّان.
ولا يعني ذلك أن من فعل الإثم ولم يجاهر به لم يأثم ولم يعاقب عليه، بل يأثم وقد يعاقب عليه، إلا أن المجاهر أقبح إثماً وأشد عقوبة منه؛ لأنه كما نقل ابن حجر عن ابن بطال : في الجهر بالمعصية استخفاف بحق الله ورسوله وبصالحي المؤمنين، ومنه ضرب من العناد لهم، وفي الستر السلامة من الاستخفاف؛ لأن المعاصي تذل أهلها ومن إقامة الحدِّ عليه إن كان فيه حد ومن التعزير إن لم يوجب حدًّا. انتهى.
فالعاصي الذي يقع في الذنب نتيجة لقهر النفس أو وسوسة الشيطان أو غلبة الهوى فيستتر بمعصيته خجلاً وحياءً من الله ومن الناس، فلا ريب أنه أهون جرماً من المجاهر.
أما الذي لا يستحي من الله ولا يعظم حدوده وإنما يراقب الناس ويراعي البشر فإن وجد بين الناس أظهر تعظيم الحدود والحرمات والفرائض، فإن خلى بنفسه سرعان ما ينتهكها ويجعل الله أهون الناظرين إليه، وهو الذي توعده النبي صلى الله عليه وسلم في الحديث الذي رواه ابن ماجه عن ثوبان والذي يقول فيه صلى الله عليه وسلم: لأعلمن أقواما من أمتي يأتون يوم القيامة بحسنات أمثال جبال تهامة بيضاء فيجعلها الله هباء منثورا، قال ثوبان: يا رسول الله صفهم لنا جلهم لنا أن لا نكون منهم ونحن لا نعلم، قال: أما إنهم إخوانكم ومن جلدتكم ويأخذون من الليل كما تأخذون ولكنهم أقوام إذا خلوا بمحارم الله انتهكوها.
فيجب عليك أن تقلع عن كل ذنب وتتوب إلى الله وتراقبه في السر والعلن، فإن من يعظم ملاحظة الناس إليه ويستهين بنظر الله إليه لم يكن من المتقين الأبرار.
والله أعلم.

--------------

حمد أحمد ربه على نعمه الغزيرة.. وتعجب من عظيم رحمته وغفرانه لذنوب عباده الضعفاء..
سبحان الله العظيم

الله سبحانه يرزق عباده طاعته.. فيثيبهم عليها وهو من رزقهم إياها..
ثم يلهمهم أن يحمدوه على ما أطاعوه، فيثيبهم على حمدهم وهو من ألهمهم الحمد..

ويمهل من عصوه ويسترهم.. حتى إذا تاب عليهم ليتوبوا، وعادوا إليه، غفر لهم وأحال سيئاتهم حسنات كأنهم لم يذنبوا..
تابوا إليه ففرح بهم وهو من رزقهم توبتهم..

رحيم سبحانه
غفور

يتهدد بوعيده وعقابه من عصاه.. فإذا عاد إليه كان حبيبه..
ويجزي من أحسن بكرمه فيضاعف حسناتهم.. ومن يذنب فله سيئة تمحى إن استغفر وتاب...

سبحان الله العظيم..
جعل لنا فرصة في كل لحظة أن نتوب إلى الله ونبدأ عهدا جديدا معه..
فإذا أخطأنا فالفرصة لا تزال أمامنا..
فإذا أخطأنا فالفرصة لا تزال أمامنا..

فلا يزال يغفر ويعفو ويستر ويرحم.. ولا يمل حتى نمل..
سبحانه شكور..


...
قام أحمد بإرسال الفتوتين السابقتين إلى خالد في إيميل ليبشره..

وفي آخر اليوم عندما دخل خالد على الإيميل وجد ما أرسله إليه أحمد..
فرح خالد كثيرا بالفتوى..وحمده ربه على كرمه وجوده الوفير.. ورد على إيميل أحمد بإيميل يشكره فيه على مجهوده

لكن بعد ذلك حينما ذهب لفراشه لينام.. انتابته فكرة غريبة..
استرجع في ذهنه كل لقاءاته الأخيرة مع أحمد بخصوص فتنة النساء وما يتعلق بها..
جزى الله أحمد خيرا.. لكن إلى ماذا وصلنا حتى الآن ؟؟

تحدثنا مرة عن معنى فتنة النساء.. ومرة أعطاني شريطا وسمعته.. رغم إني لم أطبق شيئا مما قاله الشيخ حتى الآن..
لابد أن أعيد سماع الشريط..
وبعد ذلك كلمني عن كرم الله عز وجل ومغفرته.. وأعطانى فتاوى عديدة تخص هذا الأمر..

جزاك الله خيرا يا أحمد.. لكني لا أشعر أني تحسنت حتى الآن..
نعم بالطبع أستفيد من جهودك معي.. وهذه الفتاوى الرائعة.. لكني لم أتقدم خطوة في طريق الطهارة...

حتى الآن لازلت كما أنا..

حتى الآن لازلت أسير شهواتي.. هل سأبقى هكذا يا أحمد أم ماذا...
هل ستظل تحدثني وأنا لا أتقدم..

هل...
وذهب في نوم عميق

الحلقة الثامنة
لسه ماعملناش أي حاجة !



في اليوم التالي ذهب خالد إلى الكلية وهو عازم على أن يسأل أحمد عن ما دار في ذهنه البارحة.. إلى متى سيظل هكذا.. وعن أنه يشعر أنه لا يتقدم رغم جهود أحمد الطويلة معه..

دخل خالد المدرج وكان أحمد موجودا ومعه عدة زملاء لهما..

خالد: السلام عليكم
أحمد والزملاء: وعليكم السلام ورحمة الله وبركاته
شهاب: إزيك يا ولد يا خالد
خالد ضاحكا: إزيك يا شهاب.. عامل إيه
شهاب: بخير
عمر: يا رب الدكتور ما يجيش النهاردة
أحمد: ه..
خالد بصوت منخفض : أحمد بعد إذنك معلش.. كنت عايزك في حاجة بس
أحمد: دلوقتي ؟
خالد وهو يسحبه من يده: آه معلش ثواني.. بعد إذنكم يا جماعة معلش

أحمد: إيه يا عم خير.. صحيح أنا بعتلك الإيميل امبارح..
خالد: آه شفته.. بجد ربنا يكرمك يا أحمد.. جزاك الله خيرا..
أحمد: جزانا وإياكم يا عم
خالد: معلش يا أحمد كنت عايزك في حاجة.. يمكن مش وقتها أوي بس أنا مش هأعرف أركز في المحاضرة غير لما أقولك
أحمد: إيه يا عم قلقتني.. قول..
خالد: بص يا أحمد.. بالنسبة لحوارنا الدائم.. بجد ربنا يكرمك على كل اللي أنت بتعمله معايا.. أنا فعلا مش عارف أشكرك إزاي.. بس أنا مش عارف..
أحمد متعجبا: خير قول
خالد: بص أنا مش عايزك تزعل مني، بس أنا مش حاسس إني بأتقدم
أحمد بحدة: تاني يا خالد ! احنا مش اتكلمنا في الموضوع ده من يومين

خالد: لأ يا أحمد مش قصدي كده.. وطي صوتك بس مش عايز حد يسمعنا.. أنا بأقولك شوف أنت كلمتني كام مرة ربنا يكرمك وكمان اديتني درس سمعته.. لكن أنا مش حاسس إن إيماني بيزيد.. أو يعني مش حاسس إني بأتغير.. مش قصدي إني يائس لأ صدقني.. بس أنا مش حاسس من جوايا إن فيه فرق بين دلوقتي مثلا وبين كام يوم فاتوا.. لسه موضوع الشهوة تاعبني ولسه غض البصر مش سهل وكده يعني

أحمد : لا حول ولا قوة إلا بالله
خالد: بالله عليك يا أحمد ما تزعل... أنت مش فاهمني خالص
أحمد غاضبا: أنا فاهمك يا خالد.. ببساطة أنت بتقولي يا أحمد ربنا يكرمك لكن أنا مش بأستفيد
خالد: والله العظيم ما أقصد كده ولا نيتي أصلا
أحمد: أمال إيه يا خالد ؟!!
خالد: عشان خاطري يا أحمد اهدأ.. حصل إيه بس
أحمد: خالد أنا مش زعلان عشان نفسي بس أنا مستغرب.. أنت بسهولة جدا بتهدم كل اللي بنحاول نعمله مع بعض
خالد غاضبا: يعني هو ده اللي عايزني ابقى صريح معاك ؟؟
أحمد: خالد أنا...

وقطع حوارهما دخول الدكتور للمدرج...

أحمد: نتكلم بعدين

نظر خالد بحزن إلى أحمد..
كان يريد أن يبوح لأحمد بما دار في فكره حتى يركز في المحاضرة.. الآن لا مجال أصلا لمحاولة التركيز فيها !

حاول خالد أن يخفف من حدة أحمد أثناء المحاضرة بأن "يغتت" عليه ويغمزه كل حين في جنبه..
حتى أن الدكتور كاد أن يلحظ حركات خالد الزائدة عن حدها.. لكن الله ستره


وبعد أن انتهت المحاضرة مباشرة.. همس خالد في أذن أحمد: أحمد أنا متأسف
أحمد: خلاص يا خالد
خالد: ماتزعلش مني يا أحمد.. بس صدقني أنت فهمتني غلط..
أنا كان قصدي يا أحمد أن أنا اللي مش بأتغير.. أنا اللي لسه أسير شهواتي رغم كل كلامك معايا.. أنا بأعيب في نفسي مش في كلامك..
أحمد: بس يا خالد احنا لسه ماعملناش أي حاجة !
خالد: إزاي بس يا أحمد.. كل ده ولسه ما عملناش
أحمد: طبعا، هل احنا خدنا أي خطوة عملية لغاية دلوقتي ؟؟
خالد: ممم.. بلاش بدل ما تزعل
أحمد: ماخدناش يا عم.. ما أنا عارف.. خالد أنا ممكن أقولك كلمتين نظري وبعد كده أسيبك تعاني لوحدك وتقعد تلوم في نفسك بقية عمرك وتفضل زي ما أنت ماتتغيرش
خالد: يا ستّير يا رب
أحمد: أيوة.. لكن مش ده هدفنا.. احنا عايزين نمشي على منهج ثابت وواضح، ومانتسرعش في حاجة.. عشان مانجيش بعد كده نقول عملت وسويت ولسه زي ما أنا

نظر خالد إلى الأرض مفكرا..
أحمد في ضيق: برضه مش مقتنع يا خالد؟
خالد: مقتنع يا أحمد.. مقتنع.. ومعاك حق احنا مش عايزين نقول كلمتين يحمسونا وبعدين نرجع زي الأول.. بس أنا نفسي احس حتى إني بدأت أتغير.. نفسي أحس أني ماشي في الطريق.. أحس يا أخي إني بدأت..
أحمد: هتحس يا خالد صدقني.. إن شاء الله هتحس.. بإذن الله..
فاكر يا خالد لما كلمتك أول مرة ولا تاني مرة مش فاكر.. لما قعدت أقولك يعني إيه فتنة النساء ودي فطرة وكلام كده.. فاكر؟
خالد: أيوة فاكر
أحمد: فاكر ساعتها قلتلي إيه؟ قلتلي احنا مش جايين نتناقش ونتفلسف.. وقلتلي إيه لازمة الكلام ده.. وساعتها قلتلك يا خااالد أنا مش قصدي أرخم عليك.. لكن الموضوع محتاج تفكير عميق ومش سهل..

خالد: أيوة يا أحمد فاكر، وقلتلي كمان أننا مش بنحاول نقضي على الميل والانجذاب بين الجنسين لأن ده شيء فطري ربنا خلقنا عليه.. لكن الحل هو الجهاد

أحمد: أديك قلت بنفسك.. الجهاد يا خالد.. خالد انت مستني أنك تاخد دوا مثلا فتخف من مرض فتنة النساء؟ لو مستني حاجة زي كده مش هتلاقي صدقني.. ماحدش هيقدر يعمل كده

خالد:......

أحمد: خالد.. لو سمحت اسمعني وافهمني كويس... أنا فاهم شعورك ومقدره.. وفاهم تعبك والله العظيم.. وبأحاول على قد ما أقدر أساعدك وأكلمك بواقعية.. عشان كده بأقولك.. لو أنت يا خالد مستني الحل السحري اللي هيعالجك من الشهوات والفتن في يوم وليلة.. فاعذرني أنا مش عندي حل زي ده

رفع خالد عينيه إلى عيني أحمد حزينا، فاستطرد أحمد قائلا:
ولا هتلاقيه عند حد خالص..خالد لو كانت مشاكل الدنيا كلها بتتحل في وصفة سهلة وخطوات بسيطة واحد اتنين تلاتة، تروّح البيت تعملها وتصبح تاني يوم خفيت.. مكانتش الحياة بقت بالصعوبة دي..
أنت فاكر يا خالد أن أي حد في الدنيا بيعاني من أي مشكلة أو فتنة هو فرحان أنه بيعاني منها ومش عايز يسيبها ؟؟؟
يعني أنت متخيل مثلا أن اللي بيعاني من فتنة المال وعمال يلهث ورا الفلوس وعايز يجيبها بأي طريقة.. فاكر ده مرتاح؟ فاكر أن ده علاجه سهل بس هو اللي مكسل؟؟.. واللي بيعاني من فتنة المنصب والشهرة والسمعة.. فاكر أنه ببساطة هيعالج نفسه ويبقى زي الفل ؟؟
كل حاجة محتاجة لجهاد يا خالد..أنا مش بأعقدلك الدنيا... بس كل واحد عنده مشاكل خاصة بيه هو شايفها أكبر مشاكل في العالم ومش حاسس بغيره.. وماحدش مهما كان يقدر يحل مشاكل حد إلا صاحب المشكلة نفسها..أنت فاهمني ؟

خالد: فاهمك يا أحمد
أحمد: احمد ربنا يا أخي أن ربنا منّ عليك بالالتزام ولو كنت فيك خلل..أنت أحسن من غيرك بكتير..
خالد: يا أحمد بس.. أنا مش عايز أفضل كده
أحمد في ضيق: كأنك عايز تفهمني غلط وخلاص.. خالد أنا مقلتلكش افضل كده، ولو كنت قلتلك افضل كده مكنتش كلمتك في الموضوع من الأول...

انتبه أحمد إلى صوته العالي فنظر حوله ليجد بعض الأصدقاء ينظرون إليهم في تعجب
فصمت أحمد ولم يكمل كلامه..

......

في آخر اليوم الدراسي، بينما كان أحمد وخالد عائدين إلى منطقة سكنيهما..

خالد: أحمد... ممكن ننسى اللي حصل النهاردة.. ونتكلم في موضوعنا شوية؟
لم يرد أحمد
خالد: أحمد.. إزاي أقدر أواجه موضوع الشهوة عمليا ؟
تمتم أحمد بكلمات مبهمة
خالد: بتقول إيه مش سامعك ؟

أحمد: مش هتقدر يا خالد !!



نلقاكم في الحلقة القادمة إن شاء الله تعالى

الحلقة التاسعة
مش هتقدر يا خالد !!


ملاحظة: الحلقة دي مهمة جدا.. هي طويلة شوية بس بجد مهمة..


في آخر اليوم الدراسي، بينما كان أحمد وخالد عائدين إلى منطقة سكنيهما..

خالد: أحمد... ممكن ننسى اللي حصل النهاردة.. ونتكلم في موضوعنا شوية؟
لم يرد أحمد
خالد: أحمد.. إزاي أقدر أواجه موضوع الشهوة عمليا ؟
تمتم أحمد بكلمات مبهمة
خالد: بتقول إيه مش سامعك ؟

أحمد: مش هتقدر يا خالد !!

خالد: أحمد.. أنت لسه متضايق برضه !.. مش قلنا خلاص ننسى اللي فات ؟
أحمد: أنا مش متضايق ولا حاجة
خالد: أمال إيه اللي بتقوله ده ؟؟
أحمد: أنا بأكلمك بجد.. أنا فعلا مش متضايق.. بس مش هتقدر يا خالد
خالد: هو إيه اللي مش هأقدر يا أحمد؟ أنت ليه كلامك اتغير.. كنت من شوية بتشجعني وتقولي ماتيأسش.. ودلوقتي بتقول مش هتقدر ؟!

أحمد: خالد.. أنا مش قصدي أحبطك صدقني.. بس بجد... الموضوع صعب أوي
تعجب خالد في صمت
أحمد: صدقني يا خالد.. موضوع فتنة النساء ده.. صعب أوي.. أوي..... أوي يا خالد أوي
خالد: أحمد فيه إيه !! أنت اتجننت ولا إيه .. مالك اتغيرت فجأة كده !

أحمد: أنا بأتكلم بجد.. أنا أيوة بأشجعك وكل حاجة.. بس لازم تكون عارف من الأول أن الموضوع مش سهل خالص

قلق خالد من كلمات صديقه.. ماذا يعني أحمد بهذا.. وما الذي جعله يغير أسلوبه فجأة.. هل لازال غاضبا بسبب ما حدث بينهما ؟
خالد: أحمد آ.. بص اسمعني.. أنت... لسه زعلان ؟

أحمد: واللــــــــه لأأأأأ
ابتسم خالد:
أحمد: بص يا خالد.. مفيش حاجة في الدنيا مستحيلة.. وكل شيء ممكن بإذن الله تعالى.. لكن زي ما قلتلك الموضوع محتاج جهاد..
خالد: تمام..
أحمد: موضوع فتنة النساء ده دونا عن أي شيء تاني.. عامل زي الإدمان كده.. مش سهل خالص أن الواحد يتخلص منه..

خالد: بس أكيد فيه ناس عايشين عادي يا أحمد و بيغضوا بصرهم ويحفظوا فروجهم وكل حاجة !
أحمد: أنا مقلتش أن الناس كلها وحشة يا خالد.. أنا بأقولك إدمان.. مش كل الناس مدمنين، لكن المدمن مش شايف غير نفسه.. ومش حاسس غير بالألم اللي هو فيه.. ومتهيأله أن الإدمان اللي هو واقع فيه ده عمره ما هيتخلص منه وهيفضل فيه طول عمره لحد ما يموت..

خالد في تخوف: للدرجة دي ؟
أحمد: أيوة يا خالد..
خالد: طب معلش سؤال صغير.. أنت بتتكلم عن فتنة النساء اللي هي إيه بالظبط ؟؟
أحمد: كله يا خالد.. من أول البصبصة على البنات في الشارع لغاااااااااية الفرجة على الأفلام الإباحية والعادة السرية وحتى الزنا والعياذ بالله..
...
صمت أحمد لبرهة.. فقال خالد: بس فيه مدمنين بيخفوا... صح ؟
أحمد: أيوة يا خالد
...
صمت أحمد ثانية.. فقال خالد في شك: يعني فيه أمل؟
أحمد:.....

خالد: أحمد أنت خوفتني قوي.. إيه اللي أنت بتقوله ده.. معقولة مفيش حل !.. مستحيل.. أكيد أقدر بإذن الله.. أمال أنت بتعمل إيه يا أحمـ..
أحمد: بلاش كلام عني الله يكرمك.. بلاااااااااش كلام عني أنت ماتعرفش أنا فيا إيه..
خالد: طيب طيب.. ربنا يعفو عنا جميعا.. لكن زي ماقلتلك.. فيه ناس كتير عايشين حياتهم بفضل الله مستقرين وكل حاجة جميلة.. وشباب زينا ومش متجوزين وفي نفس مجتمعنا... يبقى إيه بقى ؟
أحمد: يبقى فيه أمل إن شاء الله يا خالد
ابتسم خالد في أمل.. فقال أحمد: بس مش سهل
خالد: ييييييييييه.. ده أنت هتعقدني بجد.. أحمد ممكن بلاش شغل الفلسفة ده وتكلمني بوضوح وبصراحة ؟

أحمد: .. ماشي يا عم..
بص يا خالد.. ببساطة شديدة جدا أنت قدامك طريقين في دنيتك دي...

طريق منهم سهل وجميل وبسيط أوي.. مش هتحتاج تجاهد ولا أي حاجة.. وهتعيش مبسوط ومرتاح.. طول عمرك
هتعمل كللللللل اللي نفسك فيه.. هتشبع شهواتك في كل لحظة.. وهتمتع نفسك آخر إمتاع.. بجد.. هتعيش في لذة ملهاش آخر..
وهتنسى كل الكلام اللي قلناه بقى والجهاد والحاجات الصعبة دي..
وده ببساطة.. طريق أنك تفضل زي ما أنت أسير المعصية، وتفضل تزداد بعدا عن ربنا.... وتعيش حياتك..

الطريق التاني هو اللي بأكلمك عنه ده.. قمة الصعوبة.. قمة التعب.. محتاج جهاد بشكل خارق...
لو سلكته.. هتبقى قاعد مش على بعضك.. عمال تفرك في نفسك ومش قادر.. وهم وتعب أعصاب.. وعزلة.. وكل ما تغلط تكتئب وتبقى عايز تموت..
هتهلك نفسك.. هتبهدل نفسك.. صدقني..
طريق صعب بكل ماتحمله الكلمة من معاني...
وده طبعا طريق الالتزام.. أو بتعتبير أدق طريق الطهارة.. الطريق اللي بيه ترتقي وتسمو فوق فتنة النساء وفتنة الشهوة والعاطفة وكل المشاكل دي.. الطريق القويم اسمه....

ها يا خالد.. طول الطريقين.. تختار إيه ؟

نظر خالد في وجه أحمد متعجبا.. وكأنه ينتظر أن يكمل كلامه.. لكنه صمت هو الآخر.. فقال خالد: أنت بتسأل بجد ؟؟
أحمد: أيوة يا خالد.. بأسأل بجد فعلا..
خالد: وأنت متخيل يا أحمد أني هأقولك عايز الطريق الأول مثلا !
أحمد: خالد.. خالد.. ركز معايا... افتكر اللي قلتهولك.. الطريق الأول اللي أنت مش عايزه ده بجد سهل أوي.. ولذيذ أوي.. قمة المتعة يا خالد.. إنما الطريق التاني اللي عايزه ده صعب جدا.. مش هتقدر عليه يا خالد..

خالد: أحمد أنت مهول الموضوع جامد جدا !
أحمد: لأ أنا مش مهول حاجة.. أنا بأكلمك بجد.. وعايز منك إجابة حقيقية.. عن اقتناع تام لا يشوبه ذرة تردد.. مش إجابة محفوظة وخلاص..
خالد: يعني يا خالد الطريق التاني ده، اللي كله تعب وجهاد.. هنجاهد فيه للأبد ؟؟ مش لغاية ما ربنا ييسر لنا الزواج مثلا..
أحمد: انسى خاااااااالص موضوع الزواج ده.. اعتبر نفسك هتعيش بنفس الحال كده لغاية ما تموت..
خالد: أعوذ بالله !
أحمد: بص.. تصور أن ده طريقك في الدنيا لمدة ستين سنة قدام.. عمرك في الدنيا يعني..

صمت خالد.. لا يدري ما يقول.. ليس لأن الخيار صعب فهو بالطبع لن يختار الطريق الأول مهما حدث.. لكنه تعجب من كلام أحمد.. هل حقا يهول الأمر أم أنه محق.. يا رب سلّم..

أحمد: نسيت أقولك صحيح.. الطريق الأول طبعا نهايته معروفة.. النار.. جهنم.. بكل ما فيها من حميم وصديد وزقوم ويحموم وعذاب...
والطريق التاني طبعا نهايته الجنة.. وما أدراك ما الجنة.. الجنة يعني من الآخر ما لا عين رأت ولا أذن سمعت ولا خطر على قلب بشر..

خالد: أنت حاططني بين اختيارين غراب جدا !!
أحمد: اختار وأنت ساكت
فكر خالد ثانية.. لن يختار أبدا أي إنسان طريق المتع المستمر لمدة سنوات مهما طالت.. وفي النهاية يخلد في الجحيم....لا عاقل يفعل هذا أبدا !!

خالد: قررت خلاص..

-- فضلا قرر أنت أيضا أحد الطريقين، ثم تابع القراءة --




الحلقة العاشرة
خطوة رقم صفر



بعد ذلك بأيام قام أحمد بإرسال الإيميل التالي إلى خالد..
---

السلام عليكم ورحمة الله وبركاته

إزيك يا باشمهندز خالد.. أخبارك إيه يا عم ؟
يا رب تكون كويس وفي أحسن حال..

بالنسبة لموضوع فتن الشهوات والحاجات دي يا خالد..
عايزين بقى نبدأ مع بعض إن شاء الله نحط خطة شاملة نمشي عليها عشان مانقعش في المشاكل دي تاني بإذن الله..


بص.. أنا فكرت كتير مع نفسي.. وملقيتش فعلا بداية حقيقية أفضل من التوبة..
زي ما قلتلك كتير قبل كده، احنا محتاجين نبدأ على نضيف.. فلازم ننقي الأول نفسنا من اللي فات..

التوبة..

التوبة مهمة جدا يا خالد.. وللأسف كتير مننا بيكون فاهم التوبة غلط..
ناس فاكرة أن هي مش بتعمل حاجة تستاهل تتوب منها..
وناس فاكرة أن التوبة مجرد الواحد يقول أستغفر الله وأتوب إليه
وناس من كتر ما بتتوب وترجع للمعاصي بقت تبطل تتوب أصلا..
ربنا ينجينا يا رب

عشان كده كتير لما تيجي تكلم حد عن التوبة يحس أنك هتقول كلام متكرر وأنه مش محتاج يسمعك..

شوف يا خالد لما الرسول صلى الله عليه وسلم قال ((يا أيها الناس توبوا إلى الله واستغفروه فإني أتوب في اليوم مائة مرة)) رواه مسلم

فأنا عايز أكلمك عن التوبة بس نركز على شوية معاني مهمة..

أولا هنسمي التوبة "خطوة رقم صفر".. لأن دي أول خطوة قبل أي حاجة تاني..
وماسميتهاش خطوة رقم واحد علشان التوبة هتكون معانا في كل رحلتنا، مش في أول خطوة بس..

احنا طريقنا طويل يا خالد.. ومش معصومين.. واتفقنا أنه مش طريق سهل أبدا..
فهنحتاج نتوب كتييير.. وكل ما نضعف أو نقع.. هنتوب إن شاء الله..
مش هنيأس يا خالد لأن ربنا رحيم أوي..

عارف.. حاجة مهمة كانت بتميز الصحابة رضي الله عنهم.. التوبة من قريب..
التوبة من قريب يعني لو واحد منهم وقع في ذنب يتوب على طول.. مايستناش بقى شوية ويتباطأ ويتكاسل زي ما كتير مننا بيعمل للأسف..
كمان عدم تسويف التوبة.. هتلاقي تقريبا كل الناس اللي بتعمل معاصي عارفة أن اللي بتعمله ده حرام.. طب ما تتوب يا عم.. يقولك ادعيلي.. ويقولك هأتوب.. ويقولك لما يحصل كذا.. كأنه ضامن عمره.. سبحان الله العظيم

وفيه ناس للأسف يا خالد بتسيء الظن بالله.. تقول ربنا مش هيغفر لي.. فاكرة أن معصيتها أكبر من رحمة ربنا.. مع أن ربنا سبحانه وتعالى رحمته وسعت كل شيء..
وقلتلك قبل كده أن من أكبر الذنوب القنوط من رحمة الله تعالى..

وفيه ناس بسبب أنها مكسوفة من نفسها ومستحية من ربنا سبحانه وتعالى.. تروح تعمل معصية أكبر أنها ماتتوبش وأنها تبدأ تضيع صلواتها وتسيب الدعاء..
شوف.. عشان مكسوف يقف بين يدي الله تعالى وهو عاص.. يروح يعمل معصية أعظم !!

احنا هنتوب توبة عامة من كل الذنوب والمعاصي اللي بنعملها.. ومن تقصيرنا في الطاعات وكل حاجة.. تمام ؟
نتوب حالا يا خالد ماتستنااااش
وبعد كده هنمشي في طريقنا ونتوكل على الله تعالى ونجاهد نفسنا، لكن لو ربنا قدّر وضعفت ووقعت في الذنب يبقى لازم تتوب تاني..يعني هتحتاج ترجع للخطوة دي دايما طول رحلتنا إن شاء الله

تمام كده ؟
وبالنسبة لشروط التوبة فهي أربع شروط

شرط في الماضي: الندم والاستغفار على ما مضى
شرط في الحاضر: الإقلاع عن الذنب
شرط في المستقبل: العزم على عدم العودة
والشرط الرابع لو كان الذنب متعلق بحق حد من الناس أنك ترجعله حقه أو تستسمحه فيه يعني

عارف يا خالد.. بجد لما الواحد يتفكر في عظمة الله سبحانه، وإزاي أنه قادر على إهلاك كل اللي بيعصوه.. ومع ذلك ربنا بيمهلهم ويصبر عليهم..
وبعد ما الواحد يكون في أسوأ حالات العصيان.. ربنا يقبله لو تاب..
يا سبحان الله
ومش بس كده.. مش بس ربنا يرحمه ويستره، ده كمان يبدل سيئاته اللي فاتت لحسنات.. فيه أعظم من كده يا خالد ؟؟
في سورة الفرقان يقول الله عز وجل: "إِلَّا مَن تَابَ وَآمَنَ وَعَمِلَ عَمَلاً صَالِحاً فَأُوْلَئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُوراً رَّحِيماً"

------

يا من عدى ثم اعتدى ثم اقترف.. ثم ارعوى ثم انتهى ثم اعترف
أبشر بقول الله في آياته.. "إن ينتهوا يُغفَرْ لهم ما قد سلف"

معلش أنا عارف أني وعدتك قبل كده أجمعلك آيات وأحاديث الرجاء.. بس مستعجل شوية دلوقتي..
إن شاء الله هأجيبهالك بإذن الله..

لكن دلوقتي بأقولك يا خالد ضع قول الله تعالى "قُلْ يَا عِبَادِيَ الَّذِينَ أَسْرَفُوا عَلَى أَنفُسِهِمْ لَا تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعاً إِنَّهُ هُوَ الْغَفُورُ الرَّحِيمُ" ضعه دايما قدامك..
احنا اتكلمنا كذا مرة عن التوبة والإصرار والحاجات دي..

بس بأقولك لما تلاقي نفسك بتراودك على الذنب.. تذكر أن ربنا قوي عزيز وأن عذابه شديد..
لو بعد كده وقعت في الذنب برضه.. تذكر رحمة ربنا سبحانه ومغفرته وأنه ودود وتواب..

عارف يا خالد أن بجد التوبة دي نعمة كبيرة أوي من عند ربنا.. تخيل أن الواحد ممكن يتوب في أي مكان وفي أي لحظة.. ويتوب من أي ذنب.. يا سبحان الله
عارف.. مشكلة الذنب كمان أن أثره مش بس محصور في الدقيقة ولا الساعة اللي بتذنب فيها.. لأ ده أثره ممتد تلاقيه في كل يومك.. وفي كل حياتك..
آثار المعاصي كتير يا خالد.. واسأل أي حد على الاكتئاب والخنقة اللي بيحسها في يوم عصيانه.. وشوف حاله مع الخشوع ولا إيمانياته عاملة إيه.. صدقني أثرها صعب..

والذنب بيجيب ذنب بيجيب ذنب.. يا رب اعف عنا..

نقطة كمان مهمة.. الاعتراف بالذنب.. الاعتراف بالخطأ..
شوف دعاء سيد الاستغفار "اللهم أنت ربي لا إله إلا أنت خلقتني وأنا عبدك وأنا على عهدك ووعدك ما استطعت أبوء لك بنعمتك عليّ وأبوء بذنبي فاغفر لي فإنه لا يغفر الذنوب إلا أنت"..
الاعتراف بوجود خطأ ووجود مشكلة هو أول خطوات التغيير يا خالد..

عارف ليه ؟
لأن اللي ينكر أنه غلطان ويرمي المسؤولية على حد غيره، ده أصلا مش هيفكر أنه يتغير ولا هيحاول لأنه شايف أنه صح.. إنما لما يقول أنا فعلا غلطت هيبدأ يتحرك ويصلح نفسه..
فيه ناس بتبص للاعتراف بالخطأ أنه ضعف وتقليل من النفس.. سبحان الله.. مع أنهم لو بصوا للموضوع بنظرة تانية، إن أنا لما أعترف أني المسؤول عن اللي فات، ده معناه إني برضه مسؤول عن اللي جاي إن شاء الله..
وبالتالي أنا بإيدي أني أغير اللي جاي ده وأصلحه بإذن الله..
شوف !.. الاعتراف بالذنب يديك قوة أنك تصلح اللي جاي !!


أنا طولت عليك بالفعل يا خالد.. آخر حاجة عايز أقولهالك موقف صغير..

لقي الفضيل بن عياض رجلاً، فقال له الفضيل: كم عمرك؟ قال: ستون سنة. قال الفضيل : إذاً أنت منذ ستين سنة تسير إلى الله توشك أن تصل. فقال الرجل: إنا لله وإنا إليه راجعون! فقال الفضيل: هل عرفت معناها؟ قال: نعم، عرفت أني لله عبد وأني إليه راجع. فقال الفضيل : يا أخي! إن من عرف أنه لله عبد وأنه إليه راجع عرف أنه موقوف بين يديه، ومن عرف أنه موقوف عرف أنه مسئول، ومن عرف أنه مسئول فليعد للسؤال جواباً. فبكى الرجل وقال: يا فضيل! وما الحيلة؟ قال الفضيل: يسيرة. قال: ما هي يرحمك الله؟ قال: اتق الله فيما بقي من عمرك، يغفر لك الله ما قد مضى و ما قد بقي من عمرك.

حسيت يا خالد يعني إيه إنا لله وإنا إليه راجعون..
ربنا يعفو عني وعنك يا فتى..

واستكمالا للتوبة.. لازم نجتهد في الطاعات..
كما قال رسولنا الكريم صلى الله عليه وسلم: ((اتق الله حيثما كنت, وأتبع السيئة الحسنة تمحها, وخالق الناس بخلق حسن)), رواه الترمذي وقال حديث حسن..
وإن شاء الله هنتكلم عن موضوع الطاعات اللي بعد التوبة في خطتنا بعدين.. ابقى فكرني بس..

طبعا أنا مش محتاج أقولك أن كل آيات وأحاديث الرجاء دي وكل رحمة ربنا ومغفرته الواسعة.. مش دافع لينا أننا نتهاون ونعصي..
بالعكس.. دي دافع أننا نجاهد أكتر عشان ربنا يقبلنا ويتوب علينا لو وقعنا في الذنب..
اللهم تب علينا يا رب..

وإن شاء الله هأكلمك قريب عشان ننطلق في الخطوة التالية إن شاء الله..
في رعاية الله يا باشمهندس

الحلقة الحادية عشر
كشكولي !



بعد يومين قام أحمد بالاتصال بخالد هاتفيا

رفع خالد سماعة هاتفه قائلا: السلام عليكم
أحمد: وعليكم السلام ورحمة الله وبركاته.. إزيك ياخالد بيه
خالد: أهلا أهلا.. إزيك يا أحمد عامل إيه
أحمد: رب العالمين.. إيه الأخبار ؟
خالد: تمام ..
أحمد: أنا كنت بعت لك إيميل من يومين.. شفته ؟
خالد: آآآآه شفته والله.. يا ربي ده أنا نسيت أرد عليه..
أحمد: هههه ولا يهمك
خالد: جزاك الله خيرا بجد يا أحمد.. بجد ربنا يكرمك، الإيميل جميل جدا بس أنا انشغلت بقرايته ونسيت أرد خالص.. لكن أنا قريته من ساعتها فعلا
أحمد: ولا يهمك يا عم.. المهم تكون استفدت
خالد:

أحمد: طيب.. أنت فاضي 10 دقايق كده ولا حاجة ؟ كنت عايز أكلمك شوية في نفس الموضوع
خالد: آه يا عم قول
أحمد: طيب ممكن تجيب ورقة وقلم ؟
خالد: ورقة وقلم ؟؟ قول بس أنا هأحفظ
أحمد: ماشي براحتك.. بص يا سيدي.. أنا عايزك لما تنزل تصلي المغرب تشتري كشكول 100 ورقة فاخر جدا، واختار أجمل شكل يعجبك في المحل وأحسن خامة تحبها
خالد: كشكول إيه ؟ قول تاني كده
أحمد: ه.. طب ممكن بعد إذنك لووو سمحت تجيب ورقة وقلم وتكتب ؟
خالد: طيب ثواني
......

خالد: تمام يا فندم
أحمد: اكتب يا سيدي النقط اللي هأقولهالك دي.. اكتب شراء كشكول 100 ورقة
خالد: تمام
أحمد: ورق فاخر وخامات جميلة
خالد: تمام
أحمد: اختار الشكل اللي يعجبك أكتر حاجة حتى لو غالي شوية
خالد: بص ماتسكتش.. اتكلم وأنا لو ملحقتش أكتب هأوقفك
أحمد: طيب.. كتبت إيه ؟
خالد: شراء كشكول 100 ورقة فاخر وخامات جميلة وأختار الشكل اللي يعجبني حتى لو غالي... بس مش فاهم حاجة
أحمد: ماتقلقش هأفهمك
خالد: أوكيش.. فهّمني..

أحمد: بص يا سيدي.. ماتكتبش بس اسمعني.. الموضوع أننا في رحلتنا وجهادنا إن شاء الله هنحتاج نحط خطط ومناهج، وهنحتاج نكتب أحاسيسنا كتير.. وهتلاقي مواضيع أو مقولات تعجبك وكده هتحب تجمعها... من الآخر هتحتاج حاجة معاك دايما تذكرك باللي أنت فيه، وتكتب فيها زي مذكراتك كده، وتتابع حالتك هل بتتحسن ولا لا قدر الله بتسوء.. وهكذا

خالد: أها.. عشان كده هنعمل الكشكول ده يعني ؟؟ طب مانعمل ملف على الكمبيوتر وخلاص؟ أسهل وأسرع وكمان هيريحنا كتير في نقل المواضيع وكده

أحمد: ما أنصحكش بصراحة.. أنا شخصيا جربت أعمل فولدر على الكمبيوتر ولقيت نتيجته مش زي الكشكول خالص.. الإنسان مهما تطور بيحس بفرق بين أنه يقرأ أو يكتب على الكمبيوتر وبين أنه يمسك حاجة مادية بين إيديه.. عارف لما تقرأ كتاب حقيقي ورق، بتحس أنك عملت إنجاز بجد حتى لو كتاب صغير..
وكمان أنت هتحتاج الكشكول ده في خروجاتك ولما تكون لوحدك من غير كمبيوتر وكده يعني.. صدقني الكشكول أحسن بكتير إن شاء الله


خالد: جميل.. طب أشتري كشكول سلك ولاعادي
أحمد: براحتك خالص.. شوف انت بتحب إيه بجد وهاته.. بس بجد لازم يكون كشكول جميل ونضيف، وماتنساش أنك هتحطه في شنطتك كتير فماتجيبش كشكول 3 متر في 3 متر يعني..
خالد: .. ماشي يا سيدي

أحمد: طيب.. كمل كتابة بقى.. بعد ما تشتري الكشكول، عايزك تجلده بأحب الالوان إليك، حتى لو جلاد مشجر أو ورق هدايا يعني.. المهم يكون لون بتحبه
خالد: انت بتتكلم بجد ؟
أحمد: آه والله.. فاكرني بأتريق؟ خالد الكشكول ده هيمثل لك حاجات كتير أوي إن شاء الله، فلازم تهتم بيه جدا.. لازم يكون في أجمل شكل يجذبك ليه..
خالد: أجلده ؟
أحمد: أيوة جلده بأي لون تحبه.. أنا مثلا جلدته بورق أبيض سادة، مش جلاد حتى.. لأني بأحب الورق الأبيض السادة

خالد: طيب ماشي.. نجلده يا سيدي.. إيه كمان
أحمد: طيب الكشكول ده يا عم خالد زي ما قلتلك عايزك تهتم بيه جدا.. فأنت شوف إيه اللي بتحبه واعمله فيه.. الزق استيكرات.. اكتب بألوان مختلفة... شخبط لو بتحب الشخابيط.. وهكذا
خالد: أنت هترجعني حضانة ولا إيه يا عم
أحمد: شكلك هتنضرب النهاردة... أكمل ولا بلاش ؟
خالد: كمل يا عم أنت بتهددني ولا إيه

أحمد: هههه عشان بس تسمعني الله يكرمك
بس عايز أنبهك لنقطة مهمة.. كل اللي بنعمله ده عشان تحب الكشكول وتتعلق بيه، فلو بسببه هتكسل أنك تعمل الكشكول أصلا يبقى خسرنا الموضوع كله من الأول... فأنا عايزك تجمل وتزين كشكولك لكن برضه ماتستهلكش وقت جامد أو تكلف نفسك مجهود فوق طاقتك بدل ما تكسل أنك تعمله من الأول...

نبدأ بقى نكتب في الكشكول..

أولا أنا عايزك تسمي الكشكول ده اسم على ذوقك أنت.. اسم يعبر عن رحلتك وجهادك بحيث أول ما تسمعه أو تشوفه تفتكر عهدك مع ربنا سبحانه وتعالى..
مثلا سميه "جهاد".. سميه "سبيل النجاة".. سميه "رحلة الطهارة".. براحتك
المهم يكون اسم أنت مقتنع بيه

خالد: تمام
أحمد: بعد كده في أول صفحة من الكشكول هتكتب التالي:

بسم الله الرحمن الرحيم

"والذين جاهدوا فينا لنهدينهم سبلنا"
أو أي آية تعبر عن معنى جهاد النفس.. أو حديث شريف بتحبه ويحمل نفس المعنى..

بعدين اكتب تحت الآية اسم الكشكول اللي اخترته

بعدين اكتب تحته "فضلا لا تفتح فأنت تكشف أسراري" أو أي جملة تخللي اللي يشوفه مايقرأش اللي فيه

وبعدين تحتها اكتب اسمك

خالد: إيه الحلاوة دي.. وأنت متخيل أن لو حد شاف الكشكول ومكتوب "لا تفتح" مش هيفتح ؟؟
ده هيبقى عايز يفتح أكتر

أحمد: ماشي ما أنت أصلا مش هتخللي حد يشوف الكشكول إن شاء الله.. بس دي احتياطات.. لكن أنت هتحفظ الكشكول بتاعك في مكتبك أو في أي مكان يكون قريب منك ودايما متاح قدامك، وفي نفس الوقت مفيش مخلوق بشري يشوفه..

خالد: ربنا يستر
أحمد: بتكتب ؟
خالد: آه ماتخافش

أحمد: جميل.. صحيح يفضل تكتب على صفحة وتسيب صفحة في الكشكول.. عشان بس يبقى جميل يعني.. لكن براحتك..
المهم.. بعدين تاني صفحة اكتب فهرس الكشكول

اكتب التالي:

- الفهرس
- إقرار وتعهد
- دعاء
- لماذا أجاهد ؟
- أدلة التحريم
- منقولات ومقتبسات وخواطر
- خطط النجاة
- مذكرات مجاهد
- مسرتي للرقي
- تمارين

حلو ؟
خالد: حلو.. معاك.. ربنا يكرمك

أحمد: هأفصّل لك كل نقطة معناها إيه...

الفهرس خلاص قلناه
صفحة الإقرار والتعهد هتكون صفحة واحدة بس، هتكتب فيها إقرار بصيغة مشابهة للتالي:
اكتب ورايا

بسم الله الرحمن الرحيم
((إقرار وتعهد))

رب العالمين والصلاة والسلام على أشرف المرسلين نبينا محمد صلى الله عليه وسلم

أقر أنا فلان الفلاني - اكتب اسمك طبعا - أني قررت بإذن الله تعالى أن أغير مسار حياتي السابق فيما يتعلق بالشهوات وفتنة النساء
وأن أغض بصري عما حرم الله سواء في الواقع أو التليفزيون أو الانترنت
وأن أحفظ فرجي عن العادة السرية المحرمة
وان أستعين بالله تعالى ليعفّني ويهديني ويثبتني على الحق دائما
والله على ما أقول شهيد..

وصلى الله على نبينا محمد وعلى آله وصحبه وسلم
و رب العالمين


المجاهد عبد الله
ثم اسمك
ثم تاريخ النهاردة

بس كده.. تمام ؟

خالد: إيه !
أحمد: إيه ؟
خالد: إيه ده يا أحمد.. أنت عايز توديني في داهية.. أكتب إزاي الكلام ده..
أحمد: يا عم ماتقلقش ما أنا قلتلك ده كشكولك أنت وماحدش هيشوفه غيرك.. ولا أنا حتى..
خالد: يادي الفضيحةةةةة
أحمد: ه.. ماتقلقش يا فتى.. خير إن شاء الله.. المهم كتبت ؟؟
خالد: كتبت الإقرار في الورقة اللي معايا بس لسه هابقى أكتبه طبعا لما أجيب الكشكول إن شاء الله
أحمد: تمام
صحيح أنا عايزك في الصفحة الأولى وفي التعهد تحسن خطك قدر الإمكان.. كأنك بترسم الكلمات مش بتكتبها.. عشان تحب اللي هتكتبه، وتتعلق بيه إن شاء الله
خالد: ربنا يستر

أحمد: جميل.. بعد كده في صفحة الدعاء عايزك تكتب دعاء طوييييل بلهجتك واسلوبك أنت.. فصحى أو عامية براحتك.. ماتنساش يا خالد ده كشكولك أنت وجهادك أنت.. وماحدش شايفك غير ربنا سبحانه وتعالى..
اكتب دعاء جميل خاشع دافيء.. عبر عن اللي جواك... قل له يا رب أنا تعبت وأنا ضعيف أوي... يا رب مش قادر على نفسي... مش عارف أعمل إيه..
ناجي ربنا يا خالد..
قل له يا رب نفسي أتخلص من القرف اللي بأعمله ده والله.. بس مش قادر.. أيقنت يا رب أني مش هأعرف أعمل أي حاجة من غيرك.. يا رب ساعدني وأعنّي.. يا رب خد بإيدي أنا تعبت وجبت أخري..
قل كل الدعاء اللي جواك..

الدعاء المفروض ياخد منك صفحتين مزنقين على الأقل..أو أكتر..
ماتكتمش في نفسك حاجة..
ولو عينك دمعت وبدأت تعيط ماتحبسش دموعك.. ابكي واشتكي لله يا خالد.. اشتكيله من نفسك..

خالد: ربنا يعزك يا أحمد..
بإذن الله.. بإذن الله هأعمل كده..

أحمد: ربنا يعينك يا خالد.. معلش هي المرة دي الموضوع هيظهر أنه صعب وكبير أوي.. بس مجرد ما تجهز كشكولك الخطوات بعد كده هتكون أيسر إن شاء الله..
أنا بس عشان بأقولك كل حاجة مرة واحدة فشيلتك الدنيا فوق دماغك.. معلش

خالد: الله المستعان

أحمد: طيب.. بعد كده فيه قسم "لماذا أجاهد" ده المفروض هتكتب فيه أسباب أنت ليه عايز تبطل.. ليه عايز تتوب..
يعني ليه عايز تبطل نظر محرم أو فعل محرم.. إيه الأسباب اللي بتدفعك لكده ؟؟

القسم ده مش لازم تملاه كله في قعدة واحدة.. بس خصص له مثلا 10 صفحات..
وكل ماتفتكر حاجة ابقى ارجع واكتبها

خالد: تمام
أحمد: بعد كده فيه قسم أدلة التحريم.. وده هتكتب فيه الأدلة الشرعية على تحريم إطلاق البصر أو العادة السرية أو الكلام مع البنات أو الاختلاط أو أي حاجة متعلقة بالحوارات دي يعني..
انقل الأدلة دي من فتاوى على النت أو من اي كتاب.. ماتألفش طبعا، بس يا ريت تنقلها بإيدك عشان تستشعرها وتحس بيها..
يعني بلاش تطبعها وتلزقها.. إلا لو هتكسل تنقلها يبقى اطبعها أحسن ...

وخصص للقسم ده حوالي 10 صفحات برضه لأنك كل شوية هتلاقي فتاوى جديدة فيها معاني أكتر فتحطها..

القسم ده برضه مش لازم تملاه كله دلوقتي لكن على مر الزمن.. معايا ؟
خالد: معاك كمل

أحمد: القسم بتاع منقولات ومقتبسات وخواطر ده هتخصص له مثلا 20 صفحة..
وده هتنقل أو تقص وتلزق أو تطبع أي مقال أو موضوع أو قصة حقيقية أو غير حقيقية أو أي مقولات أو أي جملة تشوفها وتؤثر فيك... أي حاجة من الحاجات دي يعني هتحطها في القسم ده عشان ترجعلها دايما..
وده هتقص وتلزق عادي مش لازم تكتب بإيدك يعني
مع مراعاة أن فيه خواطر هتكتبها أنت بنفسك.. يعني مثلا تفكرت في آية في القرآن الكريم وقرأت تفسيرها وحسيت بجمالها فتكتب.. استشعرت معنى معين مكنتش واخد بالك منه فتكتب.. اي حاجة تحب تكتبها اكتبها

والقسم اللي بعده: خطط النجاة ده سيبه دلوقتي.. هنملاه مع بعضنا على مر الأيام إن شاء الله..
بس خصص له مثلا 10 صفحات

خالد: جميل
أحمد: قسم مذكرات مجاهد خصص له أكتر حاجة ممكنة.. 30 صفحة مثلا..
لأن ده أكتر قسم هتكتب فيه
وده هتكتب فيه مذكراتك أنت.. يعني يوم ما تجاهد وتنجح بإذن الله هتيجي وتكتب عملت كذا وكان إحساسي كذا وتحكي كل حاجة.. يوم لا قدر الله لو وقعت في ذنب هتيجي وتعبر عن مشاعرك برضه وتفضفض..
القسم ده المفروض ترجعله بصورة شبه يومية..

خالد: الله المستعان.. ها واللي بعده
أحمد: اللي بعده مسيرتي للرقي، ده هنراقب فيه مستوانا إن شاء الله. تشوف أنت بتتقدم ولا إيه وكده..
هيكون عبارة عن زي جدول كده بتكتب كل يوم التاريخ وقدامه نجحت ولا لا قدر الله وقعت.. ومثلا تقعد تعد الايام اللي نجحتها على التوالي، ولو وقعت تبدأ تعد من الأول.. ولو وصلت لرقم معين تكافئ نفسك.. حركات كده يعني..
..
سيب للقسم ده 5 صفحات مثلا

آخر قسم اللي هو التمارين ده سيبه دلوقتي هنرجعله بعدين إن شاء الله.. وده خصص له بقية الكشكول

خالد: ده على أساس أن الكشكول ليه باقي ؟؟ أنت عديت ييجي 150 صفحة لغاية دلوقتي
أحمد: ه.. بجد والله ؟ أنا ما أخدتش بالي..
طب تعالى نظبطها تاني

أول صفحة
والفهرس صفحة
والإقرار صفحة
والدعاء قول 4 صفحات
ولماذا أجاهد 10
وأدلة التحريم 10
والمنقولات والخواطر 20
والخطط 10
والمذكرات 30
والمسيرة 5 صفحات
والتمارين.. مممممم

ما زي الفل أهو يا عم.. أنت بتضحك عليا
خالد: لا والله بس كنت حاسس أنهم كتير أوي.. يللا معلش
أحمد: ده حتى الحسابات دي على أنك بتكتب في وش الصفحة بس وتسيب ظهرها زي ما قلت.. عامة ماتقلقش لو الكشكول خلص يا عم نبقى نجيب غيره.. بس أنت خلصه بس وربنا ييسر
خالد: يا رب
أحمد: صحيح.. أي حاجة هتكتبها ماتنساش تكتب التاريخ بتاعها.. مهم جدا بجد

خالد: طيب بس الموضوع يا أحمد مش حاسس أنه معقد شوية ؟
أحمد: مش أنت اللي كنت عايز خطوات عملية.. اشرب بقى.. شوف صدق نيتك ه
خالد: هههه.. لأ بجد مش كتير كده ؟
أحمد: بص.. أنا عارف أني طربقت الدنيا فوق دماغك.. بس كل اللي قلته ده حاجات بسيطة هتكتبها... وبعدين أنا طولت عشان بأشرح لكن لما أنت تيجي تنفذ هتلاقي الموضوع بسيط إن شاء الله..
مش لازم تجهز الكشكول كله في يوم واحد.. جهزه في يومين أو تلاتة مثلا.. بس ماتطولش عشان ماتكسلش بجد.. بجد يا خالد..
خالد: إن شاء الله..

أحمد: أنا مش هأسألك تاني.. أنت لما تخلص الكشكول وكل حاجة تبقى تمام تبقى تقول لي عشان نكمل رحلتنا إن شاء الله.. وطبعا لو فيه أي حاجة عايز تبقى تسألني فيها اسأل ماتتكسفش
خالد: أنا مش فاكر حاجة أصلا عشان أسأل فيها .. بس ماتقلقش لو اتلخبطت في حاجة هأسألك إن شاء الله.. وبعدين أنت مش قلت أن ده كشكولي أنا وأعمله بحيث يريحني وأحبه.. ماتقلقش
أحمد: تمام بالظبط.. يللا بقى لحسن قلتلك 10 دقايق وأدينا بقالنا نص ساعة نتكلم.. معلش أنا آسف
خالد: لا والله يا عم بالعكس ربنا يكرمك على وقتك ده كله.. أنا اللي بأستفيد
أحمد: بس ياض.. مش عايزني آخد ثواب ولا إيه هههه
خالد: بالهنا والشفا يا فندم

أحمد: ربنا يعزك... خالد أوعى تنسى أو تكسل.. الشيطان هيقرفك في عيشتك وهيحاول يشغلك عن الكشكول ده بآلاف الطرق.. الله يكرمك ماتلتفتش ليه وكمل مسيرتك..
خالد: أعوذ بالله من الشيطان الرجيم
أحمد: أعوذ بالله من الشيطان الرجيم.. ماتنساش تاخد معاك المغرب فلوس بقى عشان تشتري الكشكول إن شاء الله.. وماتسوفششششششش.. يللا يا عم.. أي خدمة ؟
خالد: اااااااا
أحمد: يا خالد.. في رعاية الله
خالد: في رعاية الله يا أحمد.. السلام عليكم
أحمد: وعليكم السلام ورحمة الله وبركاته



نلقاكم في الحلقة القادمة إن شاء الله تعالى
وماتنسوش الكشكول معاكم ; )

الحلقة الثانية عشر
هل أنا غير عادي ؟




في اليوم التالي قابل خالد أحمد في الكلية، فأسرع إليه قائلا


خالد: السلام عليكم.. أهلااااااااان وسهلاااااااااان
أحمد: وعليكم السلام ورحمة الله وبركاته.. إزيك يا فتى الإسلام
خالد: رب العالمين.. عايزك ضروري
أحمد: من أولها كده هههه.. ربنا يستر.. قول يا عم
خالد: بص يا سيدي، ووطي صوتك، بالنسبة للكشكول اللي كلمتني عليه امبارح.. أنا عندي كذا سؤال
دلوقتي أخللي كل قسم من أقسام الكشكول يبدأ بصفحة فاضية ولا لأ؟
القسم بتاع الخواطر هأكتب فيه إزاي؟
وبالنسبة لمسيرتي نحو الرقي لازم أكتب فيها كل يوم ؟؟
و..


قاطعه أحمد: إييييييييييه يا عم خالد فيه إيه.. كل دي أسئلة
يا باشمهندس أنا بأقولك ده كشكولك يعني براحتك خالص.. يا عم اكتب فيه زي ما أنت عايز.. براحتك بجد.. المهم تستفيد أنت منه..


خالد: يعني أبوظ فيه براحتي ؟
أحمد: أيوننننن براحتك خالص.. الهدف من الكشكول أنه يبقى حاجة قدامك على طول تفكرك بجهادك مع نفسك.. وتكتب فيها أي حاجة عايز ترجعلها.. زي مثلا أي خطوات نتفق عليها إن شاء الله، وهكذا..
خالد: رب العالمين


...
تفرق خالد وأحمد وانشغل كل منهما في المحاضرات والأصحاب..


بعد يومين فتح أحمد الماسنجر كعادته في نهاية الأسبوع، فوجد خالد داخلا باسم "ياااااااا رب"، بدأ أحمد الحوار مشاكسا إياه..


غفرانك إلهي: ياااااااااا رب
ياااااااا رب: ياااااااا رب
غفرانك إلهي: ياااااااا رب
ياااااااا رب: عايز إيه يا عم
غفرانك إلهي: بأرخم عليك.. عندك مانع ؟
ياااااااا رب: طب مش تقول سلام عليكم ولا حاجة
غفرانك إلهي: آسف.. السلام عليكم ورحمة الله وبركاته
ياااااااا رب: وعليكم السلام ورحمة الله وبركاته
غفرانك إلهي: ها إيه الأخبار ؟
ياااااااا رب: على كل حال
غفرانك إلهي: كان الرسول صلى الله عليه وسلم إذا رأى ما لا يعجبه قال " على كل حال"
ياااااااا رب: ما أنا عارف اضغط على الصورة لرؤيتها بالحجم الطبيعي
غفرانك إلهي: يعني أنت رأيت ما لا يعجبك ؟؟
ياااااااا رب: على كل حال.. أيوة
غفرانك إلهي: خير يا عم فيه إيه
ياااااااا رب: حالي مش ولابد برضه.. لسه مش أوي
غفرانك إلهي: معلش يا أحمد الموضوع محتاج صبر وجهاد كبير صدقني
ياااااااا رب: أحمد.. أنا بيدور في ذهني تساؤل.. مش عارف معايا حق ولا لأ
غفرانك إلهي: خير إن شاء الله.. إيه هو ؟
ياااااااا رب: هل أنا غير عادي ؟


غفرانك إلهي: لأ أنت خالد اضغط على الصورة لرؤيتها بالحجم الطبيعي
ياااااااا رب: هههه.. لأ بجد.. هل أنا غير عادي ؟
غفرانك إلهي: طب فهمني يعني، هو لازم أقولك يعني إيه ؟
ياااااااا رب: بص يا سيدي.. أنا يا خالد رب العالمين كنت من فترة مش قصيرة موضوع فتنة النساء ده مش واخد معايا الشكل الكبير ده.. أكيد كان موجود بس أنا حاسس أنه بيكبر ويزداد سوءا معايا.. عمال ياخد حيز أكبر في حياتي كل شوية..


غفرانك إلهي: تمام.. كمل
ياااااااا رب: فأنا بأسأل نفسي.. إيه اللي حصل في حياتي خللى الموضوع يكبر معايا بالشكل ده ؟؟
هل ممكن أكون أنا غير بقية الناس ؟ يعني معلش في اللفظ،هل ممكن أكون ربنا خلقني طبيعتي مختلفة عن بقية الناس بحيث موضوع الشهوات ده واخد معايا حيز أكبر من الطبيعي؟ أكون يعني - آسف - شهوتي أكبر من الطبيعي ؟
أو حاجة تانية.. هل ممكن أكون اتحسدت لأي سبب فبقيت بالحال اللي أنا فيه ده ؟


غفرانك إلهي: طب وليه ماتقولش أنك بسبب أن الموضوع بقاله فترة طويلة، فبيزداد سوءا، زي أي معصية الواحد بيعملها بتزيد معاه.. وأنت عارف المعصية بتجر المعصية وأن الشيطان مش هيسيبك تقف عند حد معين ويقولك كفاية ؟
معلش سامحني بس أنا بأكلمك بصراحة


ياااااااا رب: ولا يهمك يا عم.. ده احتمال برضه بس مش عارف.. طب أعرف إزاي ما هي كلها احتمالات واردة..
غفرانك إلهي: ويمكن حد عامل لك عمل بحيث تفكيرك يبقى موجه للحوارات دي اضغط على الصورة لرؤيتها بالحجم الطبيعي
ياااااااا رب: شكلك بتتريق، صح ؟
غفرانك إلهي: لا والله مش قصدي.. بص يا خالد... فيه نقطتين..
أول حاجة موضوع أن ربنا خلقك بحيث موضوع الشهوة عندك غير عند غيرك، أو بالوراثة أو أيا كان، فمعلش دي حاجة مش هتقدر تتأكد منها حاليا.. صح ؟ يبقى معلش يعني تنساها تماما وماتعلقش عليها أي حجج..
يعني ماتخليهاش باب الشيطان يدخل لك منه ويقولك أنت غير التانيين.. ده هم عاديين إنما أنت عندك عذر شرعي.. أنت مخلوق كده ولازم تفرغ طاقتك دي.. لو ماعملتش مش عارف إيه هتتعب وتموت..
اعذرني بس ده كلام فارغ، لأن كده هتقعد تبرر لنفسك أي حاجة بتعملها.. ولو كل الناس فكرت بالمنطق ده ماحدش هيغير من نفسه ولا يصلح منها أبدا.. صح ولا غلط ؟


ياااااااا رب: بصراحة صح.. بس مش يمكن حقيقة ؟
غفرانك إلهي: يمكن.. الله أعلم.. بس حتى لو حقيقة هتعمل إيه يعني ؟؟ خلاص هتفضل على ما أنت عليه ؟؟ معلش يا خالد احنا حتى ما بدأناش ناخد خطوات عملية ونحاول ونتعب عشان نقول مش هنقدر.. أنت كده بتطبق نظرية الشوال..
ياااااااا رب: شوال إيه ؟ اضغط على الصورة لرؤيتها بالحجم الطبيعي
غفرانك إلهي: نظرية الشِوال.. الشيخ أبو إسحاق الحويني ربنا يحفظه بيضرب مثل.. بيقولك لو عندك خادم وقلتله روح شيل الشوال اللي هناك ده انقله لمكان تاني.. فبص للشوال كده وقالك ده كبير أوي وأنا مش هأقدر.. قلتله بس روح حاول قالك مش هأقدر
رحت قلت لخادم تاني قام بص للشوال، بس راح ناحيته وحاول يشيله، لقاه تقيل وماقدرش فعلا.. حاول بجد وبدأ يحركه بس تعب ووقع منه..
إيه رأيك في الاتنين دول ؟


ياااااااا رب: ربنا يكون في عونهم.. مالهم بقى ؟
غفرانك إلهي: أنت كسيّد للخادمين دول.. هتعاقب الخادم الأول لأنه محاولش أصلا.. لكن هتتعاطف مع الخادم التاني اللي حاول وماقدرش وتجيب له مساعدة.. صح ولا غلط ؟
ياااااااا رب: تمام
غفرانك إلهي: ولله المثل الأعلى.. ماتقولش مش هأقدر من غير ما تحاول أصلا.. كل اللي بنعمله ده يا خالد لعب عيال.. لما تحاول بجد وماتقدرش ساعتها ربنا سبحانه وتعالى مش هيخذلك.. سبحانه
طالما بتجاهد نفسك لله، يبقى لما تحاول وماتقدرش ثق أن ربنا هيمدك بمدد ومعونة من عنده عز وجل


ياااااااا رب: كلام جميل.. يعني أنت تقصد أن حتى لو الموضوع صعب عليا وأنا مش هأقدر، فالمفروض أحاول وأجاهد، وأستعين بالله تعالى.. وما أفكرش في النتايج من قبل ما أحاول أصلا


غفرانك إلهي: بالظبط.. ما أنت بتفهم أهو اضغط على الصورة لرؤيتها بالحجم الطبيعي
ياااااااا رب: بس ياض


غفرانك إلهي: فموضوع أنك غير التانيين ده انساه خالص ومالكش دعوة بيه، لأنه مش هيفيدك في أي حاجة بالعكس هيؤذيك..
تاني نقطة حكاية الحسد أو حتى السحر.. ماشي كلها احتمالات واردة، ربنا يحفظنا جميعا، بس برضه مش الصح أنك تخليها شماعة تعلق عليها أمورك
يعني مش كل ما الواحد يحصل له مشكلة في دينه أو دنياه يقول أنا اتحسدت.. لأنه كده برضه بيرمي الحمل على حد غيره فيبدأ يفكر بسلبية وأنه مش بإيده حاجة يعملها


ياااااااا رب: بس زي ما أنت بتقول يا أحمد أن دي حاجات واردة
غفرانك إلهي: تمام.. يبقى إذن نعمل إيه ؟
ياااااااا رب: برضه أنساها ؟
غفرانك إلهي: طب ليه بقى.. ما أنت هنا بإيدك حاجة تعملها.. مش كده ولا إيه؟
ياااااااا رب: ألا وهي ؟
غفرانك إلهي: ألا وهي تحصين نفسك بالله تعالى من الحسد ومن السحر.. مش عندك أذكار الصباح والمساء؟ وعندك الرقية الشرعية ؟ وعندك طرق تحصين النفس من الحسد والسحر وإزاي تقي نفسك من الأمور دي ؟


ياااااااا رب: ماشي كلام جميل.. يعني المفروض أبدأ ألتزم بالأذكار صباحا ومساء.. وأبدأ أخللي حد يرقيني وكده ؟
غفرانك: تمام أذكار الصباح والمساء مهمة جدا، بس تتقال بتركيز مش كروتة وخلاص.. لكن بالنسبة للرقية الشرعية بلاش تخللي حد يرقيك.. أنت ارقي نفسك أفضل..
ياااااااا رب: اشمعنى ؟
غفرانك إلهي: أيوة يا ماما
ياااااااا رب: ؟؟!!!
غفرانك إلهي: هه.. معلش دي أمي بتنادي عليا فنسيت ورديت هنا.. ههه
ياااااااا رب: هه


غفرانك إلهي: طب بص يا خالد معلش.. أنا والدتي محتاجاني دلوقتي فلازم أقوم.. ينفع أكلمك بعدين ؟
ياااااااا رب: ماشي اتفضل.. بس أنا كنت عايز أعرف منك الرقية الشرعية والحاجات دي كويس
غفرانك إلهي: طب بص.. هأشوف والدتي وهأبقى أبعتلك إيميل إن شاء الله فيه الأذكار وفيه الرقية الشرعية كل حاجة إن شاء الله.. قشدة ؟
ياااااااا رب: قشطة اضغط على الصورة لرؤيتها بالحجم الطبيعي بس ماتتأخرش يا فندم
غفرانك إلهي: ماتقلقش هأحاول أبعتهولك الليلة إن شاء الله، أو بالكتير بكرة الفجر إن شاء الله.. معلش بقى
ياااااااا رب: ولا يهمك يا فندم.. في رعاية الله
غفرانك إلهي: ربنا يحفظك.. السلام عليكم ورحمة الله وبركاته
ياااااااا رب: وعليكم السلام ورحمة الله وبركاته.. سبحانك اللهم ربنا وبحمدك أشهد أن لا إله إلا أنت أستغفرك وأتوب إليك


نلقاكم في الحلقة القادمة إن شاء الله تعالى

الحلقة الثالثة عشر
أذكار الصباح والمساء والرقية الشرعية



في نفس الليلة قام أحمد بالبحث عن نسخة صحيحة لأذكار الصباح والمساء وللرقية الشرعية عبر الانترنت ليقوم بإرسالها إلى خالد كما وعده


وكان هذا ما أرسله إليه:


السلام عليكم ورحمة الله وبركاته


خالد بيه
اتفضل يا سيدي


أنا دورت على نسخة صحيحة إن شاء الله لأذكار الصباح والمساء وللرقية الشرعية زي ما وعدتك..


أولا بالنسبة لأذكار الصباح والمساء:



أعوذ بالله من الشيطان الرجيم {اللّهُ لاَ إِلَـهَ إِلاَّ هُوَ الْحَيُّ الْقَيُّومُ لاَ تَأْخُذُهُ سِنَةٌ وَلاَ نَوْمٌ لَّهُ مَا فِي السَّمَاوَاتِ وَمَا فِي الأَرْضِ مَن ذَا الَّذِي يَشْفَعُ عِنْدَهُ إِلاَّ بِإِذْنِهِ يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلاَ يُحِيطُونَ بِشَيْءٍ مِّنْ عِلْمِهِ إِلاَّ بِمَا شَاء وَسِعَ كُرْسِيُّهُ السَّمَاوَاتِ وَالأَرْضَ وَلاَ يَؤُودُهُ حِفْظُهُمَا وَهُوَ الْعَلِيُّ الْعَظِيمُ}.


بسم الله الرحمن الرحيم {قُلْ هُوَ اللَّهُ أَحَدٌ*اللَّهُ الصَّمَدُ*لَمْ يَلِدْ وَلَمْ يُولَدْ * وَلَمْ يَكُن لَّهُ كُفُواً أَحَدٌ}
بسم الله الرحمن الرحيم {قُلْ أَعُوذُ بِرَبِّ الْفَلَقِ * مِن شَرِّ مَا خَلَقَ *وَمِن شَرِّ غَاسِقٍ إِذَا وَقَبَ * وَمِن شَرِّ النَّفَّاثَاتِ فِي الْعُقَدِ * وَمِن شَرِّ حَاسِدٍ إِذَا حَسَدَ}
بسم الله الرحمن الرحيم {قُلْ أَعُوذُ بِرَبِّ النَّاسِ * مَلِكِ النَّاسِ * إِلَهِ النَّاسِ *مِن شَرِّ الْوَسْوَاسِ الْخَنَّاسِ * الَّذِي يُوَسْوِسُ فِي صُدُورِ النَّاسِ * مِنَ الْجِنَّةِ وَالنَّاسِ}
(ثلاث مرات).


أصبحنا وأصبح الملك لله، و، لا إله إلا الله وحده لا شريك له، له الملك وله الحمد وهو على كل شيء قدير، ربِّ أسألك خير ما في هذا اليوم وخير ما بعده وأعوذ بك من شر ما في هذه الليلة وشر ما بعدها ربِّ أعوذ بك من الكسل وسوء الكبر، ربَّ أعوذ بك من عذابٍ في النار وعذاب في القبر.


اللهم بك أصبحنا وبك أمسينا وبك نحيا وبك نموت وإليك النشور.


اللهم أنت ربي لا إله إلا أنت خَلَقتني وأنا عَبْدُك وأنا على عهدك ووعدك ما استطعت وأعوذ بك من شر ما صنعت أبوء لك بنعمتك على وأبوء بذنبي فاغفر لي فإنه لا يغفر الذنوب إلا أنت.


اللهم إني أصبحت أشهدك وأشهد حملة عرشك، وملائكتك وجميع خلقك، أنك أنت الله لا إله إلا أنت وحدت لا شريك لك، وأن محمداً عبدك ورسولك (أربع مرات).


اللهم ما أصبح بي من نعمة أو بأحد من خلقك فمنك وحدك لا شريك لك، فلك الحمد ولك الشكر.


اللهم عافني في بَدَني، اللهم عافني في سمعي، اللهم عافني في بصري، لا إله إلا أنت .اللهم إني أعوذ بك من الكفر، والفقر، اللهم إني أعوذ بك من عذاب القبر لا إله إلا أنت (ثلاث مرات).


حسبي الله لا إله إلا هو عليه توكلت وهو رب العرش العظيم (سبع مرات).


اللهم إني أسألك العافية في الدنيا والآخرة،اللهم إني أسألك والعافية في ديني ودنياي وأهلي ومالي،اللهم استر عوراتي وآمن روعاتي، اللهم احفظني من بين يديَّ ومن خلفي وعن يميني وعن شمالي ومن فوقي وأعوذ بعظمتك أن أغتال من تحتي.


اللهم عَالِمَ الغيب والشَّهادة، فاطر السموات والأرض، رب كل شيء ومليكه، أشهد أن لا إله إلا أنت أعوذ بك من شر نفسي ومن شر الشيطان وشركه وأن اقترف على نفسي سوءًا أو أجُره إلى مسلم.


بسم الله الذي لا يضرُّ مع اسمه شيء في الأرض ولا في السماء وهو السميع العليم (ثلاث مرات).


رضيت بالله رباً، وبالإسلام ديناً وبمحمد صلى الله عليه وسلم نبياً (ثلاث مرات).


يا حي يا قيوم برحمتك أستغيث أصلح لي شأني كُله ولا تَكِلْني إلى نفيس طرفة عين.


أصبحنا وأصبح الملك لله رب العالمين، اللهم إني أسألك خير هذه اليوم: فتحه، ونصره، ونوره، وبركته، وهداه، وأعوذ بك من شر ما فيه وشر ما بعده.


أصبحنا على فطرة الإسلام وكلمة الإخلاص، ودين نبيَّنا محمد صلى الله عليه وسلم وملَّة أبينا إبراهيم حنيفاً مسلماً وما كان من المشركين.


من قال: سبحان الله وبحمده (مائة مرة).


لا إله إلا الله وحده لا شريك له، له الملك وله الحمد وهو على كل شيء قدير (عشر مرات).


سبحان الله وبحمده عدد خلقهِ ورِضَا نفسِهِ وزِنُة عَرشِهِ ومِداد كلماته (ثلاث مرات إذا أصبح).


اللهم إني أسألك علماً نافعاً، ورزقاً طيباً، وعملاً متقبلاً (إذا أصبح).


أستغفر الله وأتوب إليه (مائة مرة في اليوم).


أعوذ بكلمات الله التامات من شر ما خلق (ثلاث مرات إذا أمسى).


اللهم صل وسلم على نبينا محمد (عشر مرات).


---------------------------
لو تقدر تطبعها أو تنقلها أو تشوف أي مطوية فيها الأذكار.. علشان تقرأها كل يوم إن شاء الله..


ولو عايز تسمعها بالصوت عشان تحفظها، دي نسخة للشيخ مشاري بن راشد العفاسي..
من هنا
http://www.islamway.com/?iw_s=Lesson&i...lesson_id=23406



كده تمام الأذكار ؟
-----------------------------


بالنسبة بقى للرقية الشرعية


أولا أنا ليه كنت بأقولك الأفضل ترقي نفسك بدل ما تقول لحد يرقيك ؟
علشان في البخاري ورد أن الرسول صلى الله عليه وسلم قال: ((يدخل الجنة من أمتي سبعون ألفا بغير حساب ، هم الذين لا يسترقون ، ولا يتطيرون ، وعلى ربهم يتوكلون ))


فمشايخنا قالوا علشان نكون من السبعين ألف دول بإذن الله (يااااااااا رب) فالواحد لا يطلب الرقية من غيره (لا يسترقون).. لكن يرقي نفسه، أو لو حد عرض عليك أنه يرقيك مفيش مشكلة.. المهم ماتطلبهاش أنت من حد..


أما بالنسبة لصيغة الرقية.. فدي صيغة الرقية الشرعية العامة:


- قراءة سورة الفاتحة
- وأول خمس آيات من البقرة
- وآية الكرسي
- وآخر آيتين من البقرة
- وسورة الكافرون
- والإخلاص والفلق والناس
- وآخر آيتين من سورة القلم
- ودعاء : أسأل الله العظيم رب العرش العظيم أن يشفيك ( سبع مرات )
- ودعاء : أعوذ بكلمات الله التامة من كل شيطان وهامة ومن كل عين لامة ( ثلاث مرات )


-----------------------


كده الموضوع واضح ويسير بإذن الله..
ولو عايز تستزيد، الصفحة دي لقيت فيها مجموعة من التسجيلات المكتوبة والمسموعة للرقية الشرعية لعدد من الشيوخ
لو تحب تقرأ أو تسمع أكتر يعني
http://www.khayma.com/roqia/audio.htm


وعشان تبقى متأكد من أي حاجة بتعملها لأنك ممكن تقابل في بحثك حاجات مش عارف صح ولاغلط.. فيه شروط للرقية الشرعية، أهي:


شـروط الرقيـة
يقول ابن حجر العسقلاني :
يستخلص من كلام أهل العلم أن الرقى تكون مشروعة إذا تحقق فيها ثلاثة شروط:
1) أن لا يكون فيها شرك ولا معصية .
2) أن تكون بالعربية أو ما يفقه معناه .
3) أن لا يعتقد كونها مؤثرة بذاتها بل بإذن الله تعالى .


------


تمام كده ؟
إن شاء الله هابقى أتواصل معاك قريب عشان نكمل كلامنا في الموضوع..
ربنا يعينك ويوفقك


في رعاية الله

الحلقة الرابعة عشر
اقطعها يا خالد



واعد أحمد صديقه خالد يوم الجمعة بعد الصلاة لكي يكملا نقاشهما معا


خالد: سلام عليكم
أحمد: وعليكم السلام ورحمة الله وبركاته..يا هلا
خالد: الله يكرمك
أحمد: إزيك يا باشمهندس خالد.. عساك طيب
خالد: .. وأنت أخبارك ؟
أحمد: رب العالمين.. شفت سبحان الله الخطبة كانت بتتكلم عن وساوس الشيطان
خالد: آه كانت جميلة ما شاء الله.. بس ليه مستغرب كده
ابتسم أحمد: عشان ده الموضوع اللي كنت عايز أكلمك فيه
خالد: يا راااااجل.. طب .. هنروّح بدري يعني ؟
أحمد: هههه.. أنت حر يا عم براحتك
خالد: هو الواحد مايهزرش معاك أبدا.. هههه


أحمد: صحيح أخبار الأذكار والرقية إيه ؟
خالد: والله يا سيدي أنا بدأت أواظب على الأذكار، بس لسه ماحفظتهاش أوي يعني
أحمد: والرقية ؟
خالد: لأ بصراحة لسه
أحمد: مممممممم.. هنبدأ نتدلع بقى
خالد: مش عارف ساعات الواحد يبقى متحمس أوي للحاجة، ولما تيجي لحد عنده يكسل..
أحمد: أيوة فاهمك.. فعلا ساعات أكون مثلا محتاج أعرف حكم حاجة معينة ضروري.. ومتلهف عليه جامد.. وبعدين أول ما ألاقي الحكم أكسل أقراه.. ههه
خالد: ه
أحمد: بس أكيد ده استهبال مننا يعني.. المهم
خالد: خير يا عم.. أتحفني بكلامك
أحمد: ماشي.. بس تركز معايا لأن كلامي يحوي الدرر
خالد: كلي آذان مطرطقة..


أحمد: باسم الله..
دلوقتي يا خالد أول خطوة إن شاء الله بعد التوبة في طريقنا لمواجهة فتنة النساء والتخلص من مشاكل إطلاق البصر على النساء أو العادة السرية أو الشهوة بشكل عام.. قطع الوساوس..


أنت عارف أن الشيطان مش هيسيبك في حالك.. هو عمال ليل نهار يفكر ويخطط إزاي يوقعك في المعاصي.. حتى وأنت نايم هو مش بينام..
والفرق بين الشيطان وبين النفس، إن الشيطان عايز يخليك تقع في معصية وخلاص.. يعني أي معصية.. فلو ماوقعتش في واحدة يوسوسلك بالتانية..
أما النفس بتمسك في معصية معينة بتكون هي نقطة ضعفك.. يعني واحد نقطة ضعفه في فتنة النساء، واحد نقطة ضعفة فتنة المال.. واحد نقطة ضعفه فتنة المنصب والشهرة.. وهكذا..
فلما يجتمع عليك الشيطان والنفس.. مش هتقدر تواجههم لوحدك.. لأن أنت ضعيف
قال تعالى: ((وَخُلِقَ الْإِنْسَانُ ضَعِيفًا)) سورة النساء - من آية 8


من الآخر.. لازم تستعين بربنا


خالد: ده شيء أكيد..
أحمد: جميل.. فدلوقتي تعتبر أول خطوات الوقوع في معصية هي الوساوس..
وبالتالي أول حاجة نعملها هي قطع الوساوس..


دايما التغلب على الشهوة وهي لسه في أولها بيكون أسهل.. زي الشجرة لما تكون لسه بتنبت، سهل أنك تقطعها..
إنما لو استنيت عليها لغاية ما كبرت وبقت ضخمة وجذعها كبير وجذورها ممتدة في الأرض.. أكيد مش سهل...


خالد: مش سهل.. بس مش مستحيل.. صح ؟
أحمد: ماتقلقش.. مفيش حاجة مستحيلة بفضل الله.. إياك تيأس.. أقولك، افتكر دايما الصحابة اللي انتقلوا بنور الإسلام من أوحال الكفر والشرك إلى ما وصلوا إليه من منزلة..
مفيش حاجة مستحيلة بإذن الله..


خالد: رب العالمين.. ربنا يعيننا
أحمد: آمين يا رب..
المهم عشان ما أتشعبش كتير لأن الموضوع طويل..
لازم تكون متأكد يا خالد أن قطع طريق المعصية في أولها أسهل بكتير من قطعها بعد كده..
وأي مرحلة توصل لها، مهما كانت صعوبة التخلص من المعصية فيها.. فهي أكيد أسهل من المرحلة اللي بعدها


خالد: وضح لي أكتر.. إزاي يعني
أحمد: هأفهمك.. الإمام ابن القيم بيقول ((دافع الخطرة، فإن لم تفعل صارت فكرة فدافعها، فإن لم تفعل صارت شهوة، فحاربها، فإن لم تفعل صارت همة وعزيمة، فقاومها، فإن لم تفعل وقعت في المحذور، فتداركه بالتوبة وبضده، فإن لم تفعل تعودت عليه، وصعب عليك الانتقال منه))


خالد: ممممم
أحمد: هو بالظبط الموضوع كده.. هيبدأ معاك بخطرة.. خاطرة بسيطة ووسوسة صغيرة.. تفتكر أنك سهل تتخلص منها وأن مفيش مشكلة لو استمريت فيها.. لكن لو استمريت تتحول لفكرة أصعب في التخلص منها.. ولو استمريت تتحول لفعل أصعب تتخلص منه... وهكذا..


خالد: بس معنى كده أن مدافعة الخواطر والوساوس الأولية دي.. سهل ؟
أحمد: بص.. هو أكيد محتاج جهاد.. وأكيد محتاج صبر ومحتاج عزيمة.. بس برضه أكيد أنه أسهل من مدافعة الأفكار والأفعال لما تترسخ في الذهن وتسيطر عليه..


لما تكون لسه الفكرة بتدخل دماغك أسهل أنك تمنعها من لما تكون دخلت وعششت بالفعل..


خالد: تمام..
أحمد: اقطع الوساوس من أولها.. اقطعها يا خالد.. صدقني كتير البداية بتكون أن الواحد ييجي له فكرة بسيطة.. تقعد تكبر معاه لغاية ما يقع في الذنب..
الشيطان هيقولك ادخل بس على الموقع الفلاني ولو لقيت صور وحشة مش هتبص.. اقرأ شوية في مش عارف إيه من باب العلم بالشيء.. لو لقيت حاجة حرام ابقى اخرج وماحصلش حاجة.. الشيطان هيقولك كده..
هيقولك اقرأ في كتاب إسلامي عن آداب الزواج ومعاملة الزوج مع زوجته.. أو خش اقرأ فتاوى في أمور الزواج.. أو خش منتدى تعليمي للثقافة الزوجية.. عشان تتعلم بس مش أكتر.. دي كتب دينية يا أخي..


عارف والله العظيم يا خالد.. بتبدأ كده وبعدين ماتعرفش تمسك نفسك..
وبعدين تتعلم إيه دلوقتي.. أصلا الكتب أو المواقع اللي بتتكلم عن الثقافة الزوجية والحاجات دي مش المفروووووووووض خاااااااالص أنك تقرأ فيها دلوقتي.. هتتعلم يا عم وبعدين ؟؟ هتستفيد إيه ؟؟
أنت شاب لسه مش متزوج يبقى إيه فايدة القراية في الحاجات دي دلوقتي !!
يا سيدي لما تبقى بكرة فرحك إن شاء الله ابقى اقرأ ساعتها.. إنما دلوقتي والله ده مدخل من مداخل الشيطان..


خالد: معاك حق والله.. والمشكلة أصلا أن أغلب المواقع اللي فاكرة أنها بتتكلم عن الثقافة الزوجية من باب التعليم.. للأسف كأنها مواقع إباحية.. هم فاكرين أن طالما مش بيتكلموا بصراحة كده يبقى عادي..
مش فاهم إزاي منتدى يبقى ولاد على بنات ويقعدوا يتناقشوا في الحاجات دي !!


أحمد: إنا لله وإنا إليه راجعون.. ربنا ينجينا يا خالد..
عشان كده بأقولك حتى لو محتاج تتعلم الحاجات دي سواء من كتب ولا من مواقع، فده مش وقتها.. لما تيجي تتجوز خلاص أهو إن شاء الله ابقى اقرأ ساعتها.. وساعتها أصلا مش هتقرأ من أي مواقع كده لأن أغلب المواقع للأسف بذيئة زي ما بتقول..


خالد: ربنا يعفو عنا يا رب
أحمد: اللهم آمين..
بس يا سيدي.. فأديك عرفت واقتنعت أهو أن الواحد لازم يحارب الخواطر من أولها..
قرأت مرة في كتيب بس مش فاكر اسمه بصراحة، أن اللي مثلا يقع في معصية أنه نظر نظرة محرمة.. فبدل ما يستغفر ويغض بصره، يكمل نظر بحجة أنه يشبّع نفسه فمايفكرش فيها..


طبعا تفكير فاسد.. لأن أولا هو عمره ما هيشبع زي ما هو فاكر.. المعصية عمرها ما بتشبّع ولا بتريّح يا خالد زي ما الناس فاكرة.. والله، واسأل أي حد مجرب.. هأبقى أكلمك في النقطة دي بعدين إن شاء الله
ثانيا لأن هو عامل زي مثلا واحد ماشي، فلقى قدامه طريق ضيق جدا جدا ماينفعش يمر فيه..
المهم هو اتهور وبدأ يحشر نفسه في أول الطريق كده.. يعني بدأ ينظر نظرة محرمة..
إيه الفعل الصحيح اللي يعمله ؟


خالد: أكيد يطلع ويشوف طريق تاني
أحمد: بالظبط.. هو بقى فكر وقال أنا هأكمل في الطريق ده لغاية ما أخرج من الناحية التانية.. قال هأكمل نظر لغاية ما أزهق..
طب ما أنت يا عم في أول الطريق لسه، ليه تحشر نفسك أكتر وتقعد مزنوق طول الطريق وتتخربش وتتعور لغاية ما تخرج الناحية التانية !.. هتخرج بخساير كتيرة ده لو خرجت أصلا.. ليه تقعد تنظر وتستمر في المعصية بحجة أنك تزهق وتشبع.. وعمرك ما هتزهق !!
الصح أنك تتوب وتغض بصرك من أولها..


خالد: فعلا والله.. ده الشيطان عليه حركات.. ربنا يتولانا يا رب
أحمد: ربنا ينجينا..
خالد: طيب أنا مقتنع معاك أن الصح أن الواحد يدافع خواطره من أولها.. لكن إزاااااااي ؟
أحمد: بالجهاد !
خالد: ماشي.. يعني إيه اللي أعمله.. أنت عارف أني لو صرفت تفكيري في حاجة هأرجع أفكر تاني بعد شوية..
أحمد: بص.. فيه شوية نقط عايز أقولهم لك، بس محتاجين شرح باستفاضة..
فهأقولهم لك بسرعة ونبقى نتناقش فيهم بعدين إن شاء الله


أولا زي ما قلتلك الفعل الحرام عمره ما هيريحك.. دي نقطة مهمة
ثانيا نفسك إن لم تشغلها بالطاعة شغلتك بالمعصية.. لازم يكون ليك هم أكبر مشغول بيه.. الأمة في ضياع يا خالد واحنا لسه مش عارفين نغض بصرنا..
ثالثا من ترك شيئا لله عوضه الله خيرا منه
رابعا من هم بسيئة فلم يعملها كتبت له حسنة
خامسا إنما الصبر صبر ساعة


عارف يا خالد.. ساعات الواحد يتمكن منه الشيطان ويغرق تفكيره في المعصية، لدرجة أنه يفتكر أنه خلاص عمره ما هيقدر يجاهد نفسه..
يعني يفتكر أن هو حتى لو صبر وجاهد ساعة ونسي الموضوع كله، يبقى فاكر أنه هيرجع بعد الساعة دي يرجع تاني لنفس التفكير ونفس مستوى الشهوة اللي كان فيه.. وبالتالي جهاده ما هو إلا تأخير للمعصية فترة بسيطة اللي هي فترة الجهاد


خالد: أمال إيه الصح ؟؟
أحمد: الصح أن هو لو جاهد نفسه وقدر بإذن الله يبعد تفكيره عن المعصية ولو لدقائق.. هيرجع بعدها مستقر وهادي وعادي ولا كأنه كان مثار..
فاهم قصدي ؟


خالد في خجل: إيه يا عم الكلام الفضايح ده هههه
أحمد: معلش بس لازم أقولك.. بجد لو هو صبر شوية وجاهد نفسه شوية، هيرجع تفكيره عادي تفكير منطقي هادئ مستقر.. كأن شيئا لم يكن


خالد: طب والله كلام جميل.. أنت عارف الواحد لو يستحضر كل الكلام ده ساعة ما يفكر في المعصية.. مش هيقع فيها أبدا بإذن الله
أحمد: فعلا.. لكن لأننا بننسى وبننشغل بالدنيا.. عشان كده قلتلك اعمل الكشكول واكتب فيه كل اللي نفسك فيه وكل اللي تقرأه أو تسمعه من مواعظ أو مواضيع.. أو حتى خواطرك الشخصية وجهادك.. لأن الموضوع ده إدمان.. ساعة الحالة ما بتيجي الوحد بينسى كل حاجة.. ومش بيفوق غير بعد فوات الأوان لا قدر الله
خالد: أنا بدأت بالفعل أكتب فيه .. بس ربنا يستر وماحدش يشوفه
أحمد: ما أنت اخفيه كويس بقى هههه
خالد: طيب أنا أخرتك جامد معلش.. بس لسه برضه عايزك تكلمني على وسائل الجهاد، إزاي أدافع الأفكار والوساوس وكده يعني..
أحمد: بإذن الله.. ماتقلقش لسه لينا كلام كتير إن شاء الله..


فكرتني صحيح.. فيه شريط سمعته قريب بجد كان تحفة.. اسمه "يحيى بين القدس وليلى"
خالد: اسمه إيه ؟
أحمد: "يحيى بين القدس وليلى"... ده عبارة عن رواية رائعة.. متسجلة تسجيل صوتي ومصحوبة بأناشيد.. بجد روعة
خالد: طب يعني إيه يحيى بين القدس وليلى ؟
أحمد: بلاش أحرقهالك.. بس هي ليها علاقة كبيرة بموضوع جهاد النفس ومحاربة الوساوس وإزاي الواحد ينتصر على نفسه بإذن الله..
خالد: الله.. ده شكله هيكون جامد
أحمد: إن شاء الله هيعجبك أكيد.. أنا يوم ما سمعت الشريط ده، هو 3 ساعات.. يومها قلت هأسمع نص ساعة بس ولا حاجة وأكمل بعدين، كنت بالليل متأخر أصلا..
صدقني مقدرتش أقوم من عليه إلا لما كملته للآخر
خالد: يا سلام.. طب وده ليه علاقة بفتنة النساء ؟
أحمد: بلاش أقولك أي حاجة.. إن شاء الله هأبعتلك الشريط الليلة دي بس بجد لازم تسمعه..
خالد: أكيد إن شاء الله


أحمد: طيب.. وها قد وصلنا إلى البيت.. وحان وقت الفراق
خالد: ماتسيبنيش يا أحمد.. ماتسيبنيش
أحمد: كل فراق لابد بعده من وداع يا خالد.. إهئ إهئ
خالد: هههه.. ممثل كبير
أحمد: هه.. يللا يا عم.. أي خدمة ؟
خالد: جزااااااااك الله خيرا يا فتى
أحمد: جزانا وإياكم.. في رعاية الله يا خالد
خالد: في رعاية الله.. السلام عليكم
أحمد: وعليكم السلام ورحمة الله وبركاته
سبحانك اللهم وبحمدك أشهد أن لا إله إلا أنت أستغفرك وأتوب إليك


نلقاكم في الحلقة القادمة إن شاء الله





الحلقة الخامسة عشر
يحيى.. بين القدس وليلى



....


بعدها بيومين قام أحمد بإرسال الإيميل التالي إلى خالد..


السلام عليكم ورحمة الله وبركاته


م. خالد
تحية طيبة وبعد


فإن هذا الشريط هو شريط يحيى بين القدس وليلى الذي وعدت سيادتكم بإرساله إليكم في أقرب فرصة
فها هو ذا بين يديكم لتسمعوه وتخبرونا برأيكم بعدها إن شاء الله تعالى


شاكرين لكم حسن تعاونكم


و..
بجد يا خالد الشريط جامد ما شاء الله لا قوة إلا بالله

وده اللينك ..رابط مباشر يدعم الاستكمال

هنـــــــــــــــــــــا


اسمعه بقى ما تتأخرش
ربنا ييسر لي ولك كل خير


في رعاية الله




وهاهنا نتوقف لحين إصدار حلقات أخرى