المنتديات العامة 
من طرف Eng.sanoo 6/10/2009, 8:55 pm
بسم الله الرحمن الرحيم
ازيكو يا بلديااااااااتى عاملين ايه 
... واحشنى والله ...اخش في الموضوع عدل بقى
امبارح وانا قاعد فى البيت بعدمارجعت من الجامعه بالليل (طبعا اليوم كان فاكس)لقيت نفسي قاعد مخنوق مش عارف انام ...قلت اما اتسلى شوية ....جت في دماغى فكرة انى ابعت call me back لنمرة عشوائية ...المهم بعت الرسالة وشوية جت
المفاجئة
لقيت الرقم ده بيتصل بيا في الاول كنسلت بعدين رن تانى قلت ..اما اشوف اخرة الحكاية كنت خايف اوي وانا برد لحسن يطلع واحد او واحدة تهزقنى
المهم رديت ...ردت واحدة عليا وقالتلى ثوانى خليك معايا وسمعت صوت ..تيت
شوية رد عليا واحد صوته تخين كدة وباين عليه راجل كبارة
بيني وبينكم انا اترعبت ....فسكت ومرد تش .... من كتر الذهول
لقيته بيتكلم تانى ويقلى ما ترد يا (عبدالله )
...انذهلت تانى وكنت عامل المرة دي زي الايموشن ده 
فقلتله حضرتك تعرفنى ...قالى طبعا هو في حد يتوه عنك
قلتله طيب مين معايا قالى ...ايه ده معرفتنيش ...لالالالالالا ملكش حق خالص
انا جدو حسنى يابنى .... قلتله مين ...انا جدودي ماتوا قبل اما اشوفهم ..مين معايا بقى
قالى انا جدو حسنى يا عبدو ...بتاع مصر يابنى ... قصر عابدين والحاجات دي
-قتله اهلا حبيبي وحبيب الملايين ازيك 
... وايه اخبار جيمي وابو علاء ؟؟ معلش صوتك متغير شوية
- معلش البرد شديد السنة دي
- معاك حق البرد شديد ... صحتك بالدنيا ..
-مش عارف يا (عبدو) مش عاجبني حال البلد
- ليه بس يا ريس
- الناس مش عاجبها حاجة يا (عبدو) ...... كل اما اعمل حاجة عشان اصالحهم تيجي فوق دماغى 
-ازاي بس ده انا عمرى على ما اعترضت على حاجة حضرتك عملتها
- هو انت تقدر تعترض اساسا
- قلتله ( مستغربا ) حضرتك بتقول ايه ؟؟
- قصدي ...يعني انك مترفضليش طلب ولا ايه ؟؟
- طبعا ياباشا هو انا اقدر
- المهم الناس محيراني اوي
- ليه يا كبير ؟
- تخيل لما تامر خرج من السجن ..الناس قعدت تقول كوسة ومش كوسة ... دخلته تاني الناس قعدت تقول واشمعنى هو ما اولاد المسئولين بيعملوا اللى عايزينه ...يعني انت عايزيني اضيع مجهود الناس اللى علقت يافطة في مدينة نصر ( وحشتنا )
- معلش صوابعك مش زي بعضها يا معلم !!
- ده انا حتى لما لقيت الشباب غلبان خليت دينا تنزل ترقص في وسط البلد ... لا واللى اكتر من كدة انى وصيت الامن محدش يتعرض لحد ...يجوا في الاخر يقولوا ان البلد فيها تحرش وبتاع ...يعني انا اللى غلطان ....
- لا ياباشا انت عداك العيب وأزح ...بس تعمل ايه انت في شعب واطي ميستاهلش النعمة
- انت شايف كدة ؟
- الا شايف هو في بلد زينا ..بالامانة كدة بلد ايه اللى الحشيش فيها ارخص من اللحمة .. والبانجو ارخص من القمح ... يعني الحق علينا ان احنا مدعمين الحاجة .. بدل ما يروحوا يجيبوه من برة وينضحك عليهم ... لكن تعمل ايه خيرن تعمل شرن تلقى
- يعني انت يا (عوبد )لو مكانى تقول ايه للناس اللى بيقولوا مفيش ديموقراطية ..وانى مش راضي امشي؟؟
- والله ياباشا انا مش عارف الناس دي بتناقض نفسها ولا ايه ...هدي سعادتك مثال بسيط ... عمرك شفت بلد غير بلدنا الناس بتعمل حمام في الشارع عادي ...او بلد البنات فيه بتمشي لابسة من غير هدوم ...ا و حتى اللى عايز يسرق فلوس من البنك ممكن يسرق من غير ما حد يحاسبه ... هيا دي الحرية يا كبير...
- طب والناس اللى بتلومنى على حكاية العبارة ؟
- بص ياباشا والله مش زنبنا ان الناس دي مبتعرفش تعوم ...ده حتى سيدنا عمر قال ( اذا فسد الراعي اكلت خرافه ) احم ... لا معلش قصدي ياباشا انهم كانوا زمان بيقولوا ( علموا اولادكم السباحة وركوب الخيل )
- مش متهيالى المفروض انها السباحة والرماية وركوب الخيل يا( عوبد )...
- بلاش الرماية ...انا خايف على مصلحتك
بس بقى بصراحة ان عملت اللى ميتعملش ...كباري وعملت ... رقاصات وسبت ... معتقلين وسجنت ... حشيش ووزعت ... سعد الصغير واهو بقى مطرب مصر الاول ... بصراحة اللى يقول ان البلد فيها حاجة يبقى مبيفهمش
- ياريت كل الناس زيك يا عوبد
- قلت في سري (( ما هو المشكلة ان في ناس زيي ))
سلام يا عوبد
- سلام يا باشا ومتحرمناش من رناتك ...سلام
ويجعله تامر يا جماعة ... يجعله تامر
ملاحظة : اسف على طول الموضوع بس انا كنت فرحان بالاسم الجديد مش اكتر 
ملاحظة2 : الشخصيات من واقع الخيال 
