كان يوم جميل

كان يوم جميل لما انتصرنا
و في الميدان ربك جبرنا
و من الفرح رفرف علمنا
و شوفنا يوم ف اللي ظلمنا

...
و انا كنت شاب زيكم و ف قلبي هم
عايش وحيد و انا وسطكم حاسس بغم
و حلمت مصر تعودلنا من تاني أم
نحزن نلاقي حضنها الدافي يضم


و في يوم مجيد سمعت حي على الجهاد
طلعت جموع الشعب من كل البلاد
مسلم مسيحي الكل قام من غير ميعاد
ننزع بصوتنا الحر جذور الفساد


لكن اللي خان مكفهوش ظلم السنين
و الكبرياء يعمي القلوب قبل العينين
شاف نفسه رب و الشعب اسفل سافلين
أرسل جنوده يوأدوا الحلم الجنين


و انا كنت واقف و سلاحي في ايدي علم
في عينيا صفا النيل و شموخ الهرم
بهتف بأسمك يا زهره ما بين الأمم
عديت رصاصة الغدر و فاتتلي الألم


و سقط على ارض الميدان و دمايا سالت
و غصب عني يا مصر رايتك مني مالت
و لحد اخر نبض فيا فضلت ثابت
و لما فلتت من ايديا دموعي هانت


لكن و روحي طالعه شافت الف ايد
ممدوده ترفع العلم تاني من جديد
و صوت قوي بينادي و يقول يا شهيد
حقك و حق وطنا هيرجع أكيد


و كنتوا قد الوعد يا رجال شعبنا
مصر اللي كانت غايبه رجعت أمنا
و بأيدكم الطاهره أتحقق حلمنا
و بكره هيسجل تاريخنا مجدنا


و وصيتي يا أخواني يا أحرار
بحق دم الشهداء الأبرار
حافظوا على الثوره من الأخطار
و إياك تفوتوا حلمنا ينهار